15/06/2026
Partia Lëvizja e Legalitetit (PLL), ashtu siç është shprehur vazhdimisht, mbështet çdo formë proteste paqësore si një mjet demokratik për të kërkuar llogaridhënie nga çdo qeveri dhe si një instrument të ligjshëm në duart e qytetarëve për të mbrojtur interesat e tyre.
Siç kemi deklaruar në mënyrë të vazhdueshme, mbështetur edhe në programin tonë politik, në qëndrimet tona publike dhe në veprimtarinë tonë të përditshme, PLL ka qenë dhe mbetet:
-Gjithmonë në mbështetje të interesit kombëtar dhe interesit të publikut.
- Në mbrojtje të së drejtës së pronës së pronarit legjitim dhe trashëgimtarëve të saj, si dhe kundër ligjit 7501, të cilin e konsiderojmë burim të shumë konflikteve dhe padrejtësive në lidhje me çështjen e pronës.
- Në mbështetje të një ekonomie të lirë tregu, pa monopole dhe oligopole, ku të krijohen kushte për investime të huaja serioze, me transparencë të plotë dhe në përputhje me Kushtetutën e Shqipërisë.
- Në mbështetje të standardeve demokratike dhe pluraliste, të votës së lirë dhe të barabartë, si dhe për një reformë zgjedhore që garanton përfaqësim të drejtë për qytetarët përmes një sistemi proporcional kombëtar me lista të hapura.
- Kundër ligjeve të hartuara për interesa të ngushta personale, korruptive apo të grupeve të interesit që përfitojnë në lidhje me pushtetin.
- Në mbështetje të sistemit të drejtësisë, për rend dhe siguri publike, për një sistemi drejtësie të pavarur, i cili të funksionon si pushtet ekuilibrues dhe garant i zbatimit të ligjit.
Janë pikërisht këto parime, të cilat fatmirësisht, po artikulohen dhe kërkohen sot parimisht nga këto protesta. Për këtë arsye, por edhe për shumë të tjera, PLL e mbështet këtë protestë, duke e konsideruar atë një nga lëvizjet qytetare më domethënëse dhe më kuptimplota të periudhës 35-vjeçare postkomuniste në Shqipëri.
Ne besojmë se kërkesat për drejtësi, llogaridhënie, respektim të pronës, votë të lirë dhe luftë kundër korrupsionit janë kauza që i shërbejnë interesit kombëtar dhe të ardhmes demokratike të vendit.
