02/08/2026
കാലവർഷം: മലപ്പുറം നഗരസഭയിൽ അടിയന്തര യോഗം, വാർഡുതലത്തിൽ ഇആർടി രൂപീകരിക്കും
മലപ്പുറം: ശക്തമായ കാലവർഷത്തിന്റെ പശ്ചാത്തലത്തിൽ മുന്നൊരുക്ക പ്രവർത്തനങ്ങളും ദുരന്തനിവാരണ നടപടികളും ഏകോപിപ്പിക്കുന്നതിനായി മലപ്പുറം നഗരസഭയിൽ അടിയന്തര യോഗം ചേർന്നു. നഗരസഭാ കൗൺസിലർമാർ, നഗരസഭ പരിധിയിലെ വില്ലേജ് ഓഫീസർമാർ, ഫയർ ആൻഡ് റെസ്ക്യൂ സർവീസ് ഉദ്യോഗസ്ഥർ, സിവിൽ ഡിഫൻസ് അംഗങ്ങൾ, സന്നദ്ധ സംഘടനാ പ്രവർത്തകർ, നഗരസഭാ ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.
യോഗം നഗരസഭ ചെയർപേഴ്സൺ അഡ്വ. വി. റിനിഷ ഉദ്ഘാടനം ചെയ്തു. വൈസ് ചെയർപേഴ്സൺ ജിതേഷ് ജി. അനിൽ അധ്യക്ഷത വഹിച്ചു. വാർഡുതലത്തിൽ കൗൺസിലർമാരുടെ നേതൃത്വത്തിൽ എമർജൻസി റെസ്പോൺസ് ടീം (ERT) രൂപീകരിക്കാൻ യോഗം തീരുമാനിച്ചു. അപകടഭീഷണി ഉയർത്തുന്ന മരങ്ങൾ അടിയന്തരമായി മുറിച്ചുമാറ്റുന്നതിനും മഴക്കെടുതിയിൽ സംഭവിച്ച നാശനഷ്ടങ്ങൾ ദേശീയ ദുരന്തനിവാരണ മാനദണ്ഡങ്ങളിൽ (National Disaster Management) ഉൾപ്പെടുത്തി ആവശ്യമായ സഹായം ലഭ്യമാക്കുന്നതിനായി ജില്ലാ കലക്ടറോട് അഭ്യർഥിക്കാനും തീരുമാനിച്ചു.
യോഗത്തിൽ സ്ഥിരംസമിതി അധ്യക്ഷരായ ഹാരിസ് ആമിയൻ, മറിയുമ്മ ഷെരീഫ്, സമീറ മുസ്തഫ, ആബിദ എട്ടുവീട്ടിൽ, നഗരസഭാ കൗൺസിലർമാർ, ഫയർ ഓഫീസർ ഗഫൂർ, വില്ലേജ് ഓഫീസർമാരായ നുസ്രത്ത്, ബാബു, മുഹമ്മദ്, താലൂക്ക് ആശുപത്രി സൂപ്രണ്ട് അലിഗർ ബാബു, ക്ലീൻ സിറ്റി മാനേജർ വത്സൻ, സിവിൽ ഡിഫൻസ് അംഗങ്ങളായ ഫൈസൽ, പ്രസാദ്, എമർജൻസി റാപ്പിഡ് ഫോഴ്സ് കോ-ഓർഡിനേറ്റർ മൻസൂർ എന്നിവർ പങ്കെടുത്തു.
