District Information Office Pathanamthitta

02/09/2026

ജില്ലയിലെ റവന്യൂ വകുപ്പ് പ്രവര്‍ത്തനങ്ങള്‍ മന്ത്രി എ.പി. അനില്‍കുമാര്‍ നാളെ (സെപ്റ്റംബര്‍ മൂന്ന്) അവലോകനം ചെയ്യും

റവന്യൂ വകുപ്പിന്റെ ജില്ലയിലെ വിവിധ തലങ്ങളിലുള്ള പ്രവര്‍ത്തനങ്ങള്‍ മന്ത്രി എ.പി അനില്‍ കുമാറിന്റെ അധ്യക്ഷതയില്‍ നാളെ (സെപ്റ്റംബര്‍ മൂന്ന്) അവലോകനം ചെയ്യും. രാവിലെ 10 ന് കലക്ടറേറ്റ് ഗവി കോണ്‍ഫറന്‍സ് ഹാളില്‍ വിളിച്ചു ചേര്‍ക്കുന്ന അവലോകനയോഗത്തില്‍ പട്ടയ വിതരണത്തിന്റെ തല്‍സ്ഥിതി, കൈയ്യേറ്റം ഒഴിപ്പിക്കല്‍, ഡിജിറ്റല്‍ റീ സര്‍വേ പ്രവര്‍ത്തനങ്ങള്‍, ഭൂമി ഏറ്റെടുക്കല്‍ നടപടികളുടെ പുരോഗതി, സ്മാര്‍ട്ട് വില്ലേജ് ഓഫീസുകളുടെ പ്രവര്‍ത്തനം തുടങ്ങിയവ വിശദമായ വിശകലനത്തിന് വിധേയമാക്കും.
യോഗത്തില്‍ ജില്ല കലക്ടര്‍ എ നിസാമുദ്ദീന്‍, തിരുവല്ല സബ് കലക്ടര്‍ സുമിത് കുമാര്‍ താക്കൂര്‍, അടൂര്‍ ആര്‍ഡിഒ ടി ബിനുരാജ്, എ ഡി എം, ഡെപ്യൂട്ടി കലക്ടര്‍മാര്‍, ജില്ല സര്‍വെ സൂപ്രണ്ട്, തഹസില്‍ദാര്‍മാര്‍, ജൂനിയര്‍ സൂപ്രണ്ടുമാര്‍ എന്നിവര്‍ പങ്കെടുക്കും.
അവലോകന യോഗത്തിനു ശേഷം ജില്ലയിലെ റവന്യു പ്രവര്‍ത്തനങ്ങള്‍ സംബന്ധിച്ച് വില്ലേജ് ഓഫീസര്‍മാരുമായി റവന്യൂ വകുപ്പ് മന്ത്രി ഓണ്‍ലൈനില്‍ സംവദിക്കും.

31/08/2026

ആറന്മുളയുടെ ഓണത്തിന് തിരിതെളിയിച്ച് ഉപരാഷ്ട്രപതി സി പി രാധാകൃഷ്ണൻ

ആറന്മുള ജലോത്സവം ഉദ്ഘാടനം ചെയ്തു

ആറന്മുള ഉതൃട്ടാതി ജലോത്സവം ഉപരാഷ്ട്രപതി സി പി രാധാകൃഷ്ണൻ സത്രക്കടവിൽ ഉദ്ഘാടനം ചെയ്തു. ഉച്ചയ്ക്ക് 12 ന് പ്രമാടം രാജീവ് ഗാന്ധി സ്റ്റേഡിയം ഹെലിപാഡിൽ എത്തിയ ഉപരാഷ്ട്രപതിയെ ഗവർണർ രാജേന്ദ്ര വിശ്വനാഥ് അർലേക്കർ, മന്ത്രിമാരായ റോജി എം ജോൺ, ആൻ്റോ ആൻറണി എംപി, സി വി ശാന്തകുമാർ എംഎൽഎ, ജില്ല കലക്ടർ എ നിസാമുദ്ദീൻ, ജില്ല പോലീസ് മേധാവി ആർ ആനന്ദ്, പ്രമാടം ഗ്രാമപഞ്ചായത്ത് പ്രസിഡൻറ് സുശീല അജി എന്നിവർ ചേർന്ന് സ്വീകരിച്ചു. ഉച്ചയ്ക്ക് 12.30ന് ആറന്മുള സത്രക്കടവിൽ എത്തിയ ഉപരാഷ്ട്രപതിയെ ഗവർണർ രാജേന്ദ്ര വിശ്വനാഥ് അർലേക്കർ, മന്ത്രിമാരായ രമേശ് ചെന്നിത്തല, മോൻസ് ജോസഫ്, റോജി എം ജോൺ, ആൻ്റോ ആൻറണി എംപി, എംഎൽഎമാരായ അബിൻ വർക്കി, പഴകുളം മധു, ആറന്മുള പള്ളിയോട സേവാസംഘം പ്രസിഡൻറ് കെ വി സാംബദേവൻ, സെക്രട്ടറി പ്രസാദ് ആനന്ദഭവൻ തുടങ്ങിയവർ ചേർന്ന് സ്വീകരിച്ചു. ഉച്ചയ്ക്ക് 1.40 ന് സത്രക്കടവിലെ പവലിയനിൽ ഭദ്രദീപം കൊളുത്തി ജലോത്സവം ഉപരാഷ്ട്രപതി ഉദ്ഘാടനം ചെയ്തു. തുടർന്ന് ജലഘോഷയാത്ര അദ്ദേഹം ഫ്ലാഗ് ഓഫ് ചെയ്തു ഉദ്ഘാടന പ്രസംഗം നടത്തി. ഗവർണർ രാജേന്ദ്ര വിശ്വനാഥ് അർലേക്കർ, മന്ത്രിമാരായ രമേശ് ചെന്നിത്തല, മോൻസ് ജോസഫ് എന്നിവർ സംസാരിച്ചു. പള്ളിയോട സേവാസംഘം പ്രസിഡൻറ് കെ വി സാംബദേവൻ ചടങ്ങിന് സ്വാഗതം ആശംസിച്ചു. മന്ത്രി റോജി എം ജോൺ, ആന്റോ ആൻറണി എംപി, അബിൻ വർക്കി എംഎൽഎ എന്നിവരും ഉദ്ഘാടനം ചടങ്ങിൽ ഉപരാഷ്ട്രപതി യോടൊപ്പം വേദിയിൽ സന്നിഹിതരായിരുന്നു. ചടങ്ങിനു ശേഷം ഉച്ചയ്ക്ക് 2.45 ന് ഉപരാഷ്ട്രപതി പ്രമാടം ഹെലിപാഡിലേക്കും തുടർന്ന് തിരുവനന്തപുരത്തേക്കും യാത്രതിരിച്ചു.

31/08/2026

ആറന്മുള ഉതൃട്ടാതി ജലോത്സവം ഉദ്ഘാടന ചടങ്ങിൽ ഗവർണർ രാജേന്ദ്ര വിശ്വനാഥ് അർലേക്കർ, ആഭ്യന്തര വകുപ്പ് മന്ത്രി രമേശ് ചെന്നിത്തല, ജലവിഭവ വകുപ്പ് മന്ത്രി മോൻസ് ജോസഫ് എന്നിവർ സംസാരിക്കുന്നു

31/08/2026

കേരളത്തിൻറെ സാംസ്കാരിക പൈതൃകം മറ്റുള്ളവർ പിന്തുടരേണ്ടത്: ഗവർണർ രാജേന്ദ്ര വിശ്വനാഥ്
അർലേക്കർ

കേരളത്തിൻറെ സമ്പന്നമായ സംസ്കാരിക പൈതൃകം മറ്റ് സംസ്ഥാനങ്ങൾ പിന്തുടരേണ്ടതെന്ന് ഗവർണർ രാജേന്ദ്ര വിശ്വനാഥ്
അർലേക്കർ. ആറന്മുള ഉതൃട്ടാതി ജലോത്സവം ഉദ്ഘാടന ചടങ്ങിൽ സംസാരിക്കുകയായിരുന്നു ഗവർണർ. ആറന്മുളയുടെ സംസ്കാരത്തിൻറെ പ്രതീകമാണ് വള്ളംകളി. ഉദ്ഘാടനം ചെയ്യാൻ ഉപരാഷ്ട്രപതി എത്തിയത് ഭാഗ്യമായി കാണുന്നു. നമ്മുടെ സംസ്കാരത്തെ പ്രചരിപ്പിക്കുന്ന ഇത്തരം ചടങ്ങുകൾ ലോകം അറിയണം.
ആറന്മുള വള്ളംകളിയെ വിനോദസഞ്ചാര മേഖലയിൽ ഉൾപ്പെടുത്തി കൂടുതൽ വിപുലീകരിക്കണം. മറ്റ് സംസ്ഥാനങ്ങളിൽ നിന്ന് മാത്രമല്ല ലോകത്തിൻറെ വിവിധ ഭാഗങ്ങളിൽ നിന്നുള്ള ആളുകൾ പങ്കെടുക്കുന്ന വലിയ ഉത്സവമായി മാറ്റിയെടുക്കണമെന്നും ഗവർണർ പറഞ്ഞു.

*ആറന്മുള ജലോത്സവത്തിന്റെ വിജയകരമായ നടത്തിപ്പിന് സർക്കാർ നൽകിയത് പരിപൂർണ്ണ പിന്തുണ: ആഭ്യന്തര വകുപ്പ് മന്ത്രി രമേശ് ചെന്നിത്തല*

ആറന്മുള ജലോത്സവത്തിന്റെ വിജയകരമായ നടത്തിപ്പിന് സർക്കാർ പരിപൂർണ്ണ പിന്തുണയാണ് നൽകിയെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല പറഞ്ഞു.

ആറന്മുള ഉതൃട്ടാതി ജലോത്സവം ഉദ്ഘാടന ചടങ്ങിൽ സംസാരിക്കുകയായിരുന്നു
അദ്ദേഹം. വള്ളംകളിക്ക് ആവശ്യമായ പോലീസ്, ഫയർഫോഴ്സ് സംവിധാനങ്ങൾ ആഭ്യന്തര വകുപ്പിൽ നിന്ന് പ്രത്യേകം അനുവദിച്ചു. ഇന്ത്യയുടെ ഉപരാഷ്ട്രപതി ചടങ്ങിൽ പങ്കെടുക്കുന്നു എന്നുള്ളത് അഭിമാനകരമാണ്. 52 കരകളിൽ നിന്നുള്ള പള്ളിയോടങ്ങളാണ് ഭഗവാന് മുന്നിലെത്തിച്ചേരുന്നത്. ചെന്നിത്തല പള്ളിയോടമാണ് ഏറ്റവും ദൂരത്തുനിന്ന് എത്തുന്നത്. ഭഗവാന് കാണിക്കയായും സ്വയം സമർപ്പണമായും എത്തുന്ന ഈ പള്ളിയോടങ്ങളാണ് ജലോത്സവത്തിന്റെ മാറ്റ് കൂട്ടുന്നത്. ഓരോ വർഷവും കൂടുതൽ ആളുകൾ കാഴ്ചക്കായെത്തുന്ന ചടങ്ങ് കേരളത്തിന്റെ തനതായ സാംസ്കാരിക ചരിത്രത്തെ ഉയർത്തിപ്പിടിക്കുന്നതാണ് മന്ത്രി പറഞ്ഞു.

ആറന്മുള ജലോത്സവത്തെ ഏറ്റവും പ്രാധാന്യത്തോടെയാണ് സർക്കാർ കാണുന്നതെന്ന് ജലവിഭവ വകുപ്പ് മന്ത്രി മോൻസ് ജോസഫ് പറഞ്ഞു. ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം. സമയബന്ധിതമായി ക്രമീകരണങ്ങൾ ഒരുക്കാൻ വകുപ്പുകൾ ഏകോപനത്തോടെ പ്രവർത്തിച്ചു. നദിയിലെ ജലനിരപ്പ് കൃത്യമായി നിലനിർത്തുന്നത് ഉൾപ്പെടെ ജലവിഭവ വകുപ്പിന്റെ ചുമതലയിൽ നിരവധി കാര്യങ്ങൾ ചെയ്തു. പമ്പാനദിയിൽ അടിഞ്ഞിരുന്ന മാലിന്യങ്ങളും ചെളിയും നീക്കി പള്ളിയോടങ്ങൾക്ക് സുഗമമായി കടന്നു പോകുന്നതിനു സൗകര്യമൊരുക്കി. വരും വർഷങ്ങളിലും ചടങ്ങിന്റെ വിജയകരമായ നടത്തിപ്പിന് എല്ലാ സഹകരണവും ഉണ്ടാകുമെന്ന് മന്ത്രി പറഞ്ഞു.

പള്ളിയോട സേവാസംഘം പ്രസിഡൻറ് കെ വി സാംബദേവൻ ചടങ്ങിന് സ്വാഗതം ആശംസിച്ചു.
ഉന്നത വിദ്യാഭ്യാസ മന്ത്രി റോജി എം ജോൺ, ആന്റോ ആൻറണി എംപി, അബിൻ വർക്കി എംഎൽഎ എന്നിവരും ഉദ്ഘാടന വേദിയിൽ ഉപരാഷ്ട്രപതിക്കൊപ്പം സന്നിഹിതരായിരുന്നു.

31/08/2026

ആറന്മുള ഉതൃട്ടാതി ജലോത്സവത്തിന്റെ ഉദ്ഘാടനവും ജല ഘോഷയാത്രയുടെ ഫ്ലാഗ് ഓഫും സത്രക്കടവിൽ ഉപരാഷ്ട്രപതി സി പി രാധാകൃഷ്ണൻ നിർവഹിക്കുന്നു

31/08/2026

ആറന്മുള ഉതൃട്ടാതി ജലോത്സവം ഉദ്ഘാടനം ചെയ്യാൻ ജില്ലയിലെത്തിയ ഉപരാഷ്ട്രപതി സിപി രാധാകൃഷ്ണനെ പ്രമാടം രാജീവ് ഗാന്ധി സ്റ്റേഡിയം ഹെലിപാഡിൽ സ്വീകരിക്കുന്നു

31/08/2026

ആറന്മുള ജലോത്സവം കേരളത്തിന്റെ സമ്പന്നമായ സാംസ്കാരിക പൈതൃകത്തിന്റെ പ്രതീകം : ഉപരാഷ്ട്രപതി സി പി രാധാകൃഷ്ണൻ

ആറന്മുള ഉതൃട്ടാതി ജലോത്സവം കേരളത്തിന്റെ സമ്പന്നമായ സാംസ്കാരിക പൈതൃകത്തിന്റെയും ഭക്തിയുടെയും കാലാതീതമായ പാരമ്പര്യത്തിന്റെയും പ്രതീകമെന്ന് ഉപരാഷ്ട്രപതി സി പി രാധാകൃഷ്ണൻ. ആറന്മുള സത്രക്കടവിൽ ജലോത്സവം ഉദ്ഘാടനം ചെയ്യുകയായിരുന്നു അദ്ദേഹം. ദൈവത്തിൻറെ സ്വന്തം നാട് എന്ന് വിശേഷിപ്പിക്കുന്നത് കേരളത്തെയാണ്. ഏകദേശം 1,800 വർഷം പഴക്കമുള്ള പുരാതനമായ പാർത്ഥസാരഥി ക്ഷേത്രത്തിന്റെ പേരിലാണ് നാട് അറിയപ്പെടുന്നത്. ഭൗമസൂചികാ പദവി ലഭിച്ച പ്രശസ്തമായ ആറന്മുള കണ്ണാടി നിർമ്മിക്കുന്നത് ഇവിടെയാണ്.
നമ്മുടെ പരമ്പരാഗത കലകളെയും കരകൗശല വിദ്യകളെയും സംരക്ഷിക്കുകയും പ്രോത്സാഹിപ്പിക്കുകയും ചെയ്യേണ്ടത് ആവശ്യമാണ്.
മനോഹരമായി അലങ്കരിച്ച പള്ളിയോടങ്ങളാണ് പമ്പാനദിയിൽ വള്ളംകളിയിൽ പങ്കെടുക്കുന്നത്. നൂറിലധികം തുഴച്ചിലുകാർ ഒരേ താളത്തിൽ തുഴയുന്ന ഈ പരമ്പരാഗത ചുണ്ടൻ വള്ളങ്ങൾ കായികക്ഷമതയുടെയും കരകൗശല മികവിന്റെയും ഉദാഹരണമാണ്. നൂറ്റാണ്ടുകളായി ആറന്മുള വള്ളംകളി ഇന്ത്യയിലും ലോകമെമ്പാടുമുള്ള ആളുകളെ ആകർഷിക്കുന്നു. സാംസ്കാരിക, വിനോദസഞ്ചാര ഭൂപടത്തിൽ ആറന്മുളയ്ക്ക് ശ്രദ്ധേയമായ ഒരു സ്ഥാനം നൽകാൻ ഇതിന് കഴിഞ്ഞു. ഈ പാരമ്പര്യങ്ങൾ വരുംതലമുറയ്ക്കായി നാം കാത്തുസൂക്ഷിക്കണം

നമ്മുടെ പാരമ്പര്യങ്ങൾക്ക് ആളുകളെ ഒന്നിപ്പിക്കാനും സാമൂഹിക ബന്ധങ്ങൾ ശക്തിപ്പെടുത്താനും അസാധാരണമായ കഴിവുണ്ടെന്ന് ഉത്സവങ്ങൾ നമ്മെ ഓർമ്മിപ്പിക്കുന്നു. വിദേശ രാജ്യങ്ങളിൽ ജോലി ചെയ്യുന്ന മലയാളികൾ പലപ്പോഴും ഇതിൽ പങ്കെടുക്കാൻ മാത്രം നാട്ടിലേക്ക് എത്തുന്നു.
പാരമ്പര്യവും ആധുനികതയും പരസ്പരവിരുദ്ധമായ ശക്തികളല്ല. അവയ്ക്ക് ഒരുമിച്ച് നിലകൊള്ളാൻ കഴിയും. ഇന്ത്യ അതിന്റെ സമ്പന്നമായ പാരമ്പര്യങ്ങളെ ചേർത്തുനിർത്തുന്നു. കേരളത്തിൽ ഓണം ആഘോഷിക്കുമ്പോൾ, പുരിയിൽ രഥയാത്ര നടക്കുന്നു. ഭൂമിശാസ്ത്രം, ഭാഷ തുടങ്ങിയവയിൽ വ്യത്യാസമുണ്ടെങ്കിലും നമ്മുടെ സംസ്കാരം എപ്പോഴും നമ്മെ ഒന്നിപ്പിക്കുന്നുവെന്നും അദ്ദേഹം പറഞ്ഞു

സംസ്ഥാനത്തിന്റെ പേര് കേരളം എന്നാക്കിയ ബിൽ രാജ്യസഭയിൽ പാസാക്കിയ സെഷനിൽ അധ്യക്ഷൻ ആകാൻ കഴിഞ്ഞതിലുള്ള സന്തോഷവും ഉപരാഷ്ട്രപതി പങ്കുവെച്ചു.

31/08/2026

ആറന്മുള ഉതൃട്ടാതി ജലോത്സവം ഉദ്ഘാടനം ചെയ്യാൻ പത്തനംതിട്ടയിലെത്തിയ ഉപരാഷ്ട്രപതി സി പി രാധാകൃഷ്ണനെ പ്രമാടം ഹെലിപാഡിൽ സ്വീകരിക്കുന്നു

30/08/2026

ആറന്മുള ജലമേള ; പാർക്കിംഗ് ഗ്രൗണ്ടുകളിൽ നിന്ന് ക്ഷേത്ര പരിസരത്തേക്ക് എത്താൻ കെഎസ്ആർടിസി ബസുകൾ സർവീസ് നടത്തും

ആറന്മുള ഉത്രട്ടാതി ജലമേള കാണുന്നതിനായി എത്തിച്ചേരുന്ന വാഹനങ്ങൾ പോലീസ് നിർദ്ദേശിച്ചിട്ടുള്ള പാർക്കിംഗ് ഗ്രൗണ്ടുകളിൽ പാർക്ക് ചെയ്ത ശേഷം ഈ വാഹനങ്ങളിൽ വരുന്നവർക്ക്ക്ഷേത്ര പരിസരത്തേക്കും , സത്രക്കടവ് ഭാഗത്തേക്കും പോകുന്നതിനായി നാല് കെഎസ്ആർടിസി ബസുകൾ സർവീസ് നടത്തും.

1. കോഴഞ്ചേരി , റാന്നി ഭാഗങ്ങളിൽ ഉള്ള പാർക്കിംഗ് ഗ്രൗണ്ടുകളിൽ പാർക്ക് ചെയ്യുന്ന വാഹനങ്ങളിൽ വരുന്നവർക്ക് കോഴഞ്ചേരി കെഎസ്ആർടിസി ബസ്റ്റാൻഡ് ഭാഗത്തുനിന്നും ഈ സൗകര്യം പ്രയോജനപ്പെടുത്താവുന്നതാണ്.
2. ചെങ്ങന്നൂർ മാലക്കര കോഴിപ്പാലം ഭാഗങ്ങളിലുള്ള പാർക്കിംഗ് ഗ്രൗണ്ടുകളിൽ നിന്നും വരുന്നവർക്ക് മാലക്കര ഭാഗത്ത് ബസ് സൗകര്യം ലഭിക്കുന്നതാണ്.
3. പന്തളം കുളനട കിടങ്ങന്നൂർ നാൽക്കാരിക്കൽ ഭാഗങ്ങളിൽ നിന്ന് വരുന്ന വാഹനങ്ങളിൽ വരുന്നവർക്ക് കിടങ്ങന്നൂർ മുതൽ ബസ് സൗകര്യം ലഭിക്കുന്നതാണ്.
4. പത്തനംതിട്ട ഇലന്തൂർ തെക്കേമല ഭാഗങ്ങളിൽ നിന്ന് വരുന്ന വാഹനങ്ങളിൽ വരുന്നവർക്ക് തെക്കേമലയിൽ നിന്നും വാഹന സൗകര്യം ലഭിക്കുന്നതാണ്.
വി വി ഐ പി യുടെ വാഹന വ്യൂഹം കടന്നുപോകുന്നതിന് തടസ്സം വരാത്ത രീതിയിൽ പരമാവധി പൊതുജനങ്ങൾക്ക് പ്രയോജനം ലഭിക്കത്തക്ക തരത്തിലാണ് ഈ സംവിധാനം ഒരുക്കിയിട്ടുള്ളത് എന്ന് ജില്ലാ പോലീസ് മേധാവി ആർ ആനന്ദ് അറിയിച്ചു.

30/08/2026

https://www.facebook.com/share/p/1Do6Uf39fe/

ആറന്മുള ഉതൃട്ടാതി ജലമേള ഉദ്ഘാടനത്തിനായി ഉപരാഷ്ട്രപതി സി പി രാധാകൃഷ്ണൻ എത്തുന്നതുമായി ബന്ധപ്പെട്ട് ഓഗസ്റ്റ് 30 ഞായറാഴ്ച രാവിലെ ഒമ്പത് മുതൽ വിവിധ സ്ഥലങ്ങളിൽ ഏർപ്പെടുത്തിയിട്ടുള്ള ഗതാഗത നിയന്ത്രണങ്ങൾ

കോന്നി ജംഗ്ഷൻ മുതൽ ആറാട്ടുപുഴ വരെയുള്ള സ്ഥലങ്ങളിലാണ് നിയന്ത്രണം ഉള്ളത്

കോന്നി ജംഗ്ഷൻ :

ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ കോന്നി ജംഗ്ഷനിൽ നിന്ന് തെങ്ങുംകാവ് - പൂങ്കാവ് ഭാഗത്തേക്ക് വാഹനങ്ങൾ കടത്തിവിടില്ല.

തെങ്ങുംകാവ് ജംഗ്ഷൻ :
ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ പൂങ്കാവ് ഭാഗത്തേക്ക് പോകുന്ന വാഹനങ്ങളെ കോന്നി മലയോര ഹൈവേ വഴി തിരിച്ചുവിടും.

തോന്ന്യാമലയിലേക്കുള്ള റോഡ് :

ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ തോന്ന്യാമല ഭാഗത്ത് നിന്ന് വരുന്ന വാഹനങ്ങൾക്ക് സെന്റ് പീറ്റേഴ്സ് ജംഗ്ഷനിലേക്ക് പോകാൻ കഴിയില്ല. വാഹനങ്ങളെ ജില്ലാ പോലീസ് മേധാവിയുടെ ക്യാമ്പ് ഓഫീസ് ജംഗ്ഷനിലേക്ക് തിരിച്ചുവിടും.

ജില്ലാ പോലീസ് മേധാവിയുടെ ക്യാമ്പ് ഓഫീസ് ജംഗ്ഷൻ (ഡിപിഒ ജംഗ്ഷൻ) :
രാവിലെ ഒമ്പത് മുതൽ കടമ്മനിട്ട ഭാഗത്ത് നിന്ന് വരുന്ന വാഹനങ്ങളെ സെന്റ് പീറ്റേഴ്സ് ജംഗ്ഷനിലേക്ക് കടത്തിവിടാതെ ഡിപിഒ ജംഗ്ഷനിലേക്ക് തിരിച്ചുവിടും. പത്തനംതിട്ടയിൽ നിന്ന് കോഴഞ്ചേരിയിലേക്ക് പോകുന്ന വാഹനങ്ങളെ കടമ്മനിട്ട വഴി തിരിച്ചുവിടും


ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ സെന്റ് പീറ്റേഴ്സ് ജംഗ്ഷനിലേക്ക് ഡി പിഒ ജംഗ്ഷനിൽ നിന്നും വാഹനം കടത്തിവിടില്ല.

മൈലപ്ര ജംഗ്ഷൻ:
ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ, പത്തനംതിട്ട ടൗണിലേക്ക് പ്രവേശിക്കുന്നത് തടയുന്ന രീതിയിൽ വാഹനങ്ങളെ വഴി തിരിച്ചുവിടും

കുമ്പഴ ജംഗ്ഷൻ:
ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ പത്തനംതിട്ട ടൗണിലേക്കുള്ള പ്രവേശനം ഒഴിവാക്കി വാഹനങ്ങളെ മലയോര ഹൈവേ വഴി തിരിച്ചുവിടും.

അബാൻ ജംഗ്ഷൻ :
ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ അഴൂർ, മിനി സിവിൽ സ്റ്റേഷൻ ഭാഗങ്ങളിലേക്കുള്ള ഗതാഗതം തടഞ്ഞ് വാഹനങ്ങൾ വഴിതിരിച്ചുവിടും.

സെൻട്രൽ ജംഗ്ഷൻ :
ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ അഴൂർ ജംഗ്ഷനിലേക്കും സ്റ്റേഡിയം ജംഗ്ഷനിലേക്കും വാഹനങ്ങൾ പ്രവേശിക്കാതെ വഴി തിരിച്ചുവിടും.

മിനി സിവിൽ സ്റ്റേഷൻ ജംഗ്ഷൻ :
ഉപരാഷ്ട്രപതി എത്തുന്നതിന് 30 മിനിറ്റ് മുമ്പ് മുതൽ, വാഹനങ്ങളെ അവയുടെ യാത്രാദിശയ്ക്കനുസരിച്ച് ഡിപിഒ, അബാൻ ജംഗ്ഷനുകളിലേക്ക് വഴി തിരിച്ചുവിടും.

ശബരി ബാലാശ്രമത്തിലേക്കുള്ള റോഡ് :
രാവിലെ 9.00 മുതൽ ശബരി ബാലാശ്രമത്തിലേക്കുള്ള റോഡിലൂടെയുള്ള വാഹനങ്ങളുടെ ഗതാഗതം നിയന്ത്രിക്കും. ഡ്യൂട്ടിയിലുള്ള പോലീസ് ഉദ്യോഗസ്ഥരുടെ നിർദ്ദേശപ്രകാരം മാത്രമേ വാഹനങ്ങൾ അനുവദിക്കൂ.

എം ടി എൽപിഎസ് നാൽക്കാലിക്കലിന് സമീപം കോഴിപ്പാലത്തേക്കുള്ള ചെറിയ റോഡ് :
രാവിലെ 9.00 മുതൽ, കിടങ്ങന്നൂരിൽ നിന്ന് ഐക്കര ജംഗ്ഷനിലേക്ക് വരുന്ന വാഹനങ്ങളെ കോഴിപ്പാലം ഭാഗത്തേക്ക് തിരിച്ചുവിടും കോഴിപ്പാലത്ത് നിന്ന് വരുന്ന വാഹനങ്ങളെ കിടങ്ങന്നൂർ ഭാഗത്തേക്കും തിരിച്ചുവിടും.

നാൽക്കാലിക്കൽ സ്കൂൾ ജംഗ്ഷൻ :
രാവിലെ 9 മണി മുതൽ കിടങ്ങന്നൂരിൽ നിന്ന് ഐക്കര ജംഗ്ഷനിലേക്ക് പോകുന്ന വാഹനങ്ങളെ കോഴിപ്പാലം ഭാഗത്തേക്ക് തിരിച്ചുവിടും. കോഴിപ്പാലത്ത് നിന്ന് വരുന്ന വാഹനങ്ങളെ കിടങ്ങന്നൂർ ഭാഗത്തേക്കും തിരിച്ചുവിടും.

വാഴെപ്പടി ജംഗ്ഷൻ :
രാവിലെ ഒമ്പത് മുതൽ കിടങ്ങന്നൂരിൽ നിന്ന് ഐക്കര ജംഗ്ഷനിലേക്ക് പോകുന്ന വാഹനങ്ങളെ കോഴിപ്പാലം ഭാഗത്തേക്ക് തിരിച്ചുവിടും. കോഴിപ്പാലത്ത് നിന്ന് വരുന്ന വാഹനങ്ങളെ കിടങ്ങന്നൂർ ഭാഗത്തേക്ക് തിരിച്ചുവിടും.

കിടങ്ങന്നൂർ ജംഗ്ഷൻ :
രാവിലെ ഒമ്പത് മുതൽ ആറന്മുളയിലേക്ക് പോകുന്ന വാഹനങ്ങളെ ട്രാഫിക് പ്ലാൻ പ്രകാരം ചെങ്ങന്നൂർ, കോഴിപ്പാലം തുടങ്ങിയ അനുയോജ്യമായ മറ്റ് റോഡുകളിലേക്ക് തിരിച്ചുവിടും.

കോഴിപ്പാലം ജംഗ്ഷൻ :
രാവിലെ ഒമ്പത് മുതൽ ആറന്മുള സത്രംകടവ് പ്രദേശത്തേക്ക് വാഹനങ്ങൾ പ്രവേശിക്കുന്നത് തടയും.

കോഴിപ്പാലം പാലം / ആഞ്ഞിലിമൂട് പാലം :
രാവിലെ ഒമ്പത് മുതൽ ചെങ്ങന്നൂർ ഭാഗത്തുനിന്നെത്തുന്ന വാഹനങ്ങളെ അഞ്ജിലിമൂട് പാലം വഴി തിരിച്ചുവിടും

മലങ്കര ജംഗ്ഷൻ :
രാവിലെ ഒമ്പത് മുതൽ ചെങ്ങന്നൂരിൽ നിന്ന് പന്തളത്തേക്ക് പോകുന്ന വാഹനങ്ങളെ മലങ്കര ജംഗ്ഷനിൽ നിന്ന് വഴിതിരിച്ചുവിടും

ആറാട്ടുപുഴ ജംഗ്ഷൻ :
രാവിലെ ഒമ്പത് മുതൽ, ചെങ്ങന്നൂർ ഭാഗത്തുനിന്നെത്തുന്ന വാഹനങ്ങളെ ആറാട്ടുപുഴ പാലം വഴി തിരിച്ചുവിടും.

*കോഴഞ്ചേരി*

പഴയതെരുവ് ജംഗ്ഷൻ :
രാവിലെ ഒമ്പത് മുതൽ കോഴഞ്ചേരിയിൽ നിന്ന് പത്തനംതിട്ടയിലേക്ക് പോകുന്ന വാഹനങ്ങളെ പഴയതെരുവ് ജംഗ്ഷനിൽ നിന്ന് കടമ്മനിട്ട വഴി തിരിച്ചുവിടും.

ടി.ബി. ജംഗ്ഷൻ :
രാവിലെ ഒമ്പത് മുതൽ തെക്കേമല ജംഗ്ഷനിലേക്കുള്ള പ്രവേശനം ഒഴിവാക്കുകയും വാഹനങ്ങളെ കോഴഞ്ചേരി വൺ-വേ പാതയിലൂടെ തിരിച്ചുവിടുകയും ചെയ്യും.

ഉപരാഷ്ട്രപതിയുടെ സന്ദർശനവുമായി ബന്ധപ്പെട്ട് നാളെ (ഓഗസ്റ്റ് 29, ശനിയാഴ്ച) രാവിലെ ഒമ്പത് മുതൽ നടക്കുന്ന റിഹേഴ്സലുമായി ബന്ധപ്പെട്ടും ഇതേ രീതിയിൽ ഗതാഗത നിയന്ത്രണങ്ങൾ ഉണ്ടായിരിക്കും.

ആറന്മുള ഉതൃട്ടാതി ജലമേള സുഗമമായി പൂർത്തിയാക്കുന്നതിനും ജില്ലയിൽ എത്തിച്ചേരുന്ന ഉപരാഷ്ട്രപതിയുടെ സന്ദർശനം സുരക്ഷിതമായി പൂർത്തിയാക്കുന്നതിനുമായി പൊതുജനങ്ങൾ ഗതാഗത നിയന്ത്രണ നിർദേശങ്ങളോട് പൂർണമായി സഹകരിക്കണമെന്ന് പത്തനംതിട്ട ജില്ലാ പോലീസ് മേധാവി ആർ. ആനന്ദ് അറിയിച്ചു.