Biblioteka Kombëtare e Kosovës “Pjetër Bogdani”

12/08/2026

Në Këndin Amerikan gjeni një koleksion të pasur librash në gjuhën angleze, me tituj në fusha të ndryshme, nga letërsia dhe historia te kultura, shkenca, teknologjia dhe edukimi, si dhe tituj për fëmijë dhe të rinj.

Si pjesë e Bibliotekës Kombëtare të Kosovës “Pjetër Bogdani”, librat e këtij koleksioni mund të huazohen.

Një mundësi më shumë për të lexuar, mësuar dhe njohur më nga afër kulturën amerikane.

07/08/2026

Lahuta, çiftelia, sharkia dhe fyelli janë pjesë e rëndësishme e traditës sonë muzikore. Këto instrumente tradicionale mund t’i gjeni në Bibliotekën Muzikore të Bibliotekës Kombëtare të Kosovës “Pjetër Bogdani”, së bashku me materiale të tjera që lidhen me fushën e muzikës.

05/08/2026

British Art in the Victoria and Albert Museum
Michael Darby
London: Philip Wilson, 1983

Ky botim i Michael Darby prezanton një përzgjedhje të veprave nga koleksionet e Muzeut Victoria and Albert në Londër. Përmes pikturës, skulpturës dhe arteve dekorative, libri ofron një vështrim mbi zhvillimin e artit britanik dhe pasurinë e një prej koleksioneve më të njohura muzeore.

Libri është pjesë e Fondit të Arteve Bashkëkohore të Bibliotekës Kombëtare të Kosovës “Pjetër Bogdani”.

03/08/2026

A e dini se në Bibliotekën Kombëtare të Kosovës mund të gjeni materiale përgatitore për testet ndërkombëtare TOEFL, SAT, GMAT dhe GRE?

Këto materiale janë pjesë e koleksionit të Këndit Amerikan dhe janë në dispozicion për të gjithë ata që po përgatiten për studime ose aplikime akademike jashtë vendit.

31/07/2026

Rolling Stones: Unseen Archives është një libër që sjell në fokus historinë, energjinë dhe trashëgiminë e një prej grupeve më ikonike të rock-ut. Përmes fotografive të rralla dhe momenteve të papublikuara më parë, ai ofron një vështrim autentik mbi koncertet, prapaskenat dhe rrugëtimin artistik të The Rolling Stones.

Librin mund ta gjeni në fondin e Bibliotekës Muzikore të Bibliotekës Kombëtare të Kosovës “Pjetër Bogdani”.

Ejani të zbuloni këtë dhe shumë tituj të tjerë që pasurojnë koleksionin tonë muzikor.

28/07/2026

⏰ Rikujtim!

Kanë mbetur vetëm edhe dy ditë për aplikim në Thirrjen për kumtesa në kuadër të Javës së Bibliotekës në Kosovë 2026.

📚 Ju ftojmë të aplikoni në kohë dhe të bëheni pjesë e programit të sivjetshëm të Javës.

THIRRJE PËR KUMTESA

Biblioteka Kombëtare e Kosovës fton studiues, ish-punonjës të Rilindjes, akademikë, bibliotekarë, arkivistë, gazetarë, juristë dhe të gjithë të interesuarit të bëhen pjesë e simpoziumit:

“Trashëgimia e Ndërmarrjes Shoqërore Rilindja në kujtesën kulturore shqiptare”

Afati për paraqitjen e abstrakteve:
30 korrik 2026

Aplikimet:
[email protected]

Më shumë informacione:
https://bkk-pjeterbogdani.rks-gov.net/events/thirrje-per-kumtesa/

Të dhënat e fotografisë:
Puna e radhitjes me pincetë, Shtypshkronja Rilindja, 1962.

Arkivi personal i Abdurrahman Abdullahut (1932–2003), radhitës në Rilindje.

22/07/2026

📚 Biblioteka Kombëtare e Kosovës – destinacion i vizitorëve!

Edhe gjatë muajve të verës, Biblioteka Kombëtare e Kosovës vazhdon të mirëpresë një numër të madh turistësh dhe vizitorësh nga diaspora.

Ky interes dëshmon se Biblioteka Kombëtare mbetet një pikëtakim i dijes, kulturës dhe trashëgimisë në çdo stinë të vitit.

Faleminderit të gjithë atyre që e bëjnë bibliotekën pjesë të përvojës së tyre në Kosovë! 🇽🇰

21/07/2026

Nënshkruhet memorandumi për ekspozimin e makinës së shtypit të ish-shtëpisë botuese “Rilindja” në Bibliotekën Kombëtare të Kosovës

Sot, Biblioteka Kombëtare nënshkroi Memorandumin e Mirëkuptimit me Komunën e Prishtinës – Drejtorinë e Kulturës, për huazimin e një makine Offset, pjesë e makinerive të ish-shtëpisë botuese “Rilindja”, të cilat u blenë nga Komuna e Prishtinës në vitin 2020, me iniciativën e nismave qytetare ArkiviRilindja dhe Hapësira.

Ky bashkëpunim synon promovimin e historisë së shtypshkronjës dhe trashëgimisë së botimit në Kosovë, duke mundësuar ekspozimin publik të kësaj makinerie në kuadër të Javës së Bibliotekës në Kosovë.

Përmes kësaj iniciative, synojmë të rikthejmë në vëmendje një pjesë të çmuar të trashëgimisë sonë kulturore, duke vlerësuar rolin e shtypshkronjës “Rilindja” në zhvillimin e kulturës së shkruar dhe botimit në Kosovë.

17/07/2026

Në Bibliotekën Kombëtare, procesi i digjitalizimit të materialeve bibliotekare po vazhdon me intensitet të lartë dhe standarde të larta cilësie. 📚💻

Puna e përditshme në digjitalizimin e librave, gazetave dhe librave të rrallë kontribuon në ruajtjen afatgjatë të trashëgimisë sonë dokumentare, duke e bërë atë më të qasshme për studiuesit, hulumtuesit dhe publikun.

Ruajtja e së kaluarës përmes teknologjisë është investim për dijen dhe brezat e ardhshëm.

16/07/2026

Salla e madhe e leximit në Bibliotekën Kombëtare të Kosovës po rifunksionalizohet për t’iu rikthyer misionit të saj në shërbim të përdoruesve

Pas punimeve të realizuara në këtë hapësirë, është punuar me kujdes të veçantë edhe në përzgjedhjen dhe sistemimin e titujve nga fusha të ndryshme, të cilët tashmë janë të ekspozuar dhe të qasshëm për studentët, studiuesit dhe të gjithë lexuesit.

Ky proces është rezultat i përkushtimit dhe punës së vazhdueshme të stafit të Departamentit për Zhvillimin dhe Përpunimin e Koleksioneve, me synim krijimin e një ambienti më të përshtatshëm dhe funksional për lexim, studim dhe hulumtim.

Biblioteka Kombëtare e Kosovës punon vazhdimisht për përmirësimin e shërbimeve dhe krijimin e mundësive të reja, me qëllim që të jetë sa më pranë lexuesve.