Ministria për Punë, Familje dhe Vlerat e Luftës Çlirimtare

30/09/2026

Konstituohet Këshilli Nacional për Siguri dhe Shëndet në Punë

Me konstituimin e Këshillit Nacional për Siguri dhe Shëndet në Punë, Ministria për Punë, Familje dhe Vlerat e Luftës Çlirimtare i jep një shtysë të re angazhimit institucional për sigurinë dhe shëndetin në vendin e punës.

Në takimin e parë të Këshillit, Ministri për Punë, Familje dhe Vlerat e Luftës Çlirimtare, z. Andin Hoti, u zgjodh Kryetar, Ministri i Shëndetësisë, z. Arben Vitia, u zgjodh Nënkryetar ndërsa eksperti për siguri dhe shëndet në punë, z. Burim Islami, u zgjodh Sekretar.

Ministri Hoti theksoi se angazhimi për sigurinë dhe shëndetin në punë po shoqërohet me rezultate konkrete. Vetëm gjatë këtij viti, Inspektorati Qendror i Punës ka realizuar mbi 8,600 inspektime dhe ka ndaluar punimet në 290 vendpunishte ku është evidentuar rrezik për sigurinë dhe shëndetin e punëtorëve. Po ashtu, është realizuar një inspektim i jashtëzakonshëm në nivel vendi, ndërsa inspektimi digjital tashmë zbatohet në mbi 90% të inspektimeve. Në të njëjtën kohë, po përmbyllet rekrutimi i 39 inspektorëve të rinj dhe po punohet në pajisjen e inspektorëve me vetura të reja, për rritjen e kapaciteteve dhe efikasitetit në terren.

Përmes Këshillit synohet të zhvillohet dialogu social ndërmjet institucioneve, punëdhënësve dhe punëmarrësve, në mënyrë që çështjet e sigurisë dhe shëndetit në punë të diskutohen në mënyrë të drejtpërdrejtë dhe të adresohen përmes politikave dhe veprimeve konkrete.

Hapi i radhës është hartimi i Planit të Punës së Këshillit, përmes një grupi punues, i cili do të përgatisë draftin fillestar për shqyrtim dhe finalizim në mbledhjen e radhës.

25/09/2026

Mbi 150 përfaqësues të ofruesve të shërbimeve sociale dhe familjare informohen për legjislacionin e ri për licencim

Ministria për Punë, Familje dhe Vlerat e Luftës Çlirimtare, përmes Departamentit për Politika të Shërbimeve Sociale dhe Familjare, ka zhvilluar pesë sesione informuese rajonale me qëllim të informimit të institucioneve publike, organizatave jo qeveritare, sektorin privat ofruese të shërbimeve sociale dhe familjare lidhur me legjislacionin e ri sekondar për procesin e licencimit dhe plotësimit te kushteve te reja.

Sesionet informuese janë zhvilluar me komunat pjesë e regjionit të Prishtinës, Pejës, Gjakovës dhe Prizrenit, Mitrovicës së Jugut dhe Veriut, si dhe Gjilanit e Ferizajt, ku kanë marrë pjesë mbi 150 përfaqësues të institucioneve qeveritare dhe lokale, Qendrave për Punë Sociale, organizatave të shoqërisë civile, shtëpive në komunitet, si dhe ofruesve të shërbimeve për fëmijë dhe persona të moshuar, përfshirë edhe biznese që ofrojnë shërbime sociale dhe kujdes për personat e moshuar.

Qëllimi i sesioneve ishte prezantimi dhe sqarimi i kërkesave të përcaktuara me Udhëzimin Administrativ (MPFVLÇ) Nr. 01/2026, (MPFVLÇ) Nr. 02/2026, të cilat përcaktojnë kushtet minimale për themelimin e institucioneve në kuptim të stafit profesional, infrastrukturës dhe pajisjeve, kriteret dhe procedurën e licencimit, ri-licencimit, dhënien e licencës dhe procesin e pezullimit të licencimit të ofruesve të shërbimeve sociale dhe familjare.

Gjatë sesioneve janë prezantuar kriteret dhe standardet për licencim, dokumentacioni i nevojshëm, procedurat dhe hapat e procesit të licencimit, si dhe përgjegjësitë e ofruesve në zbatimin e kërkesave të përcaktuara me legjislacionin e ri.

Zhvillimi i sesioneve kontribuon në rritjen e informimit të ofruesve të shërbimeve, përgatitjen e tyre për zbatimin e legjislacionit të ri dhe forcimin e bashkëpunimit ndërmjet institucioneve publike, organizatave të shoqërisë civile dhe sektorit privat në fushën e shërbimeve sociale dhe familjare.

Sesionet informuese janë organizuar nga Departamenti për Politika të Shërbimeve Sociale dhe Familjare, në kuadër të Ministrisë për Punë, Familje dhe Vlerat e Luftës Çlirimtare, në bashkëpunim dhe me mbështetjen e Syri i Vizionit, në kuadër të programit “Fuqizimi i Fëmijëve për Ndryshim Politikash dhe Pjesëmarrje”, të zbatuar në partneritet me Save the Children Kosova, me mbështetjen e Sida.

25/09/2026

Ministri Hoti priti në takim kryetarin e Odës Ekonomike të Kosovës, Lulzim Rafunën

Përshtatja e politikave dhe prioriteteve me nevojat e tregut të punës në sektorin privat, zhvillimi i kapitalit njerëzor dhe ndikimi i Inteligjencës Artificiale në tregun e punës në Kosovë ishin në fokus të takimit të Ministrit për Punë, Familje dhe Vlerat e Luftës Çlirimtare, z. Andin Hoti, me kryetarin e Odës Ekonomike të Kosovës, z. Lulzim Rafuna, i shoqëruar nga znj. Venera Rexha, Drejtoreshë e Departamentit të Shërbimeve për Eksportues, B2B dhe Panaire, dhe z. Besim Mustafa, Drejtor i Departamentit për Bashkëpunim Ndërkombëtar.

Ministri Hoti theksoi rëndësinë e bashkëpunimit me Odën Ekonomike të Kosovës për përafrimin e politikave të punësimit dhe aftësimit profesional me nevojat e sektorit privat, ndërsa të dyja palët u zotuan për thellimin dhe zgjerimin e bashkëpunimit në fushat me interes të përbashkët dhe potencial për rezultate konkrete.

Kryetari i OEK-ut, z. Lulzim Rafuna, prezantoi punën, aktivitetet dhe synimet e Odës, duke shprehur gatishmëri të plotë për mbështetjen e nismave në fushat me interes të përbashkët, ndërsa vlerësoi angazhimin dhe punën e Ministrisë.

24/09/2026

Ministri Hoti priti në takim përfaqësuesit e Save the Children në Kosovë, të udhëhequr nga z. Ahmet Kryeziu

Në takim u diskutua për bashkëpunimin e vazhdueshëm ndërmjet Ministrisë për Punë, Familje dhe Vlerat e Luftës Çlirimtare dhe Save the Children në fushën e mbrojtjes së fëmijëve, rezultatet e arritura dhe forcimin e mëtejshëm të politikave, shërbimeve dhe mekanizmave për mbrojtjen e të drejtave të fëmijëve në Kosovë.

Përfaqësuesit e Save the Children prezantuan punën dhe kontributin e organizatës në Kosovë, si dhe tri fushat tematike të strategjisë së tyre, duke theksuar rëndësinë e partneritetit me institucionet publike për adresimin e nevojave dhe sfidave me të cilat përballen fëmijët dhe familjet.

Ministri Hoti vlerësoi bashkëpunimin e vazhdueshëm ndërmjet institucioneve të Republikës së Kosovës dhe Save the Children, duke theksuar rëndësinë e koordinimit institucional dhe të partneritetit me organizatat ndërkombëtare e të shoqërisë civile.

Në takim pati dakordim që bashkëpunimi të fuqizohet përmes përcaktimit të prioriteteve konkrete dhe planifikimit të përbashkët, ndërsa u diskutua edhe mundësia e formalizimit të tij përmes një marrëveshjeje të përbashkët.

MPFVLÇ mbetet e përkushtuar që, së bashku me partnerët, të avancojë politikat dhe mekanizmat për mbrojtjen e fëmijëve dhe familjes dhe të kontribuojë në krijimin e një mjedisi të sigurt, gjithëpërfshirës dhe dinjitoz për çdo fëmijë në Kosovë.

23/09/2026

Ministria për Punë, Familje dhe Vlerat e Luftës Çlirimtare shpreh keqardhje për tendencën kaq të ulët të individëve dhe mediave të caktuara për ta sulmuar Qeverinë pikërisht në një prej pikave më të forta të saj: mbështetjen e fëmijëve dhe familjeve.

Ua rikujtojmë se Shtesat për Fëmijë janë realizuar pikërisht nga kjo Qeveri, prandaj është e papranueshme që, pa asnjë fakt, pa asnjë argument dhe pa i kushtuar as dy minuta leximit të legjislacionit në fuqi, të fabrikohen pretendime të paqena dhe të tentohet të ndërtohet një skandal aty ku institucionet thjesht po zbatojnë ligjin.

Numri i përfituesve në kuadër të Programit të Shtesave për Fëmijë është dinamik dhe ndryshon në vazhdimësi, si rezultat i zbatimit të kritereve të përcaktuara për këtë program dhe përditësimit të të dhënave të përfituesve.

Në këto ndryshime ndikojnë një sërë faktorësh, përfshirë përfshirjen e fëmijëve të rinj në program, arritjen e moshës 16-vjeçare, ndryshimin e rrethanave të përfituesve, përditësimin dhe harmonizimin e të dhënave me regjistrat institucionalë, si dhe proceset e rregullta të verifikimit të përmbushjes së kritereve.

Në rastet kur gjatë administrimit të programit nevojiten verifikime shtesë, pagesa mund të suspendohet deri në përfundimin e procedurave përkatëse. Suspendimi gjatë procesit të verifikimit nuk nënkupton automatikisht largim përfundimtar nga programi apo konstatim të keqpërdorimit.

Të gjitha vendimet lidhur me vazhdimin apo ndërprerjen e përfitimit merren në bazë të kritereve dhe procedurave të përcaktuara me aktet në fuqi, duke respektuar edhe të drejtat procedurale të palëve.

Rrjedhimisht, diferenca ndërmjet numrit të përfituesve në muaj të ndryshëm nuk mund të konsiderohet në tërësi si numër i personave që kanë keqpërdorur programin dhe as të përkthehet automatikisht në dëm financiar. Çdo rast trajtohet dhe verifikohet individualisht, ndërsa aty ku eventualisht konstatohet përfitim i pabazuar, veprohet në përputhje me legjislacionin në fuqi.

Ministria do të vazhdojë administrimin dhe verifikimin e rregullt të programit, me qëllim që mbështetja të vazhdojë të ofrohet për të gjithë fëmijët që plotësojnë kriteret e përcaktuara.

23/09/2026

22/09/2026

Vazhdon procesi i hartimit të Projektligjit për ndryshimin dhe plotësimin e Ligjit për Sigurinë dhe Shëndetin në Punë

Në kuadër të procesit të hartimit të Projektligjit për ndryshimin dhe plotësimin e Ligjit Nr. 04/L-161 për Sigurinë dhe Shëndetin në Punë, më 21-22 shtator është zhvilluar punëtoria me pjesëmarrjen e anëtarëve të Grupit Punues dhe palëve relevante të interesit.

Projektligji synon të avancojë kuadrin ligjor për sigurinë dhe shëndetin në punë, duke forcuar masat parandaluese dhe vlerësimin e riskut në vendin e punës, përcaktuar më qartë përgjegjësitë e punëdhënësve dhe personave përgjegjës për sigurinë dhe shëndetin në punë, si dhe rritur përfshirjen e të punësuarve në çështjet e sigurisë dhe shëndetit në punë.

Projektligji synon njëkohësisht përafrimin e kuadrit ligjor vendor me standardet e Bashkimit Evropian në fushën e sigurisë dhe shëndetit në punë, në përputhje me Direktivën 89/391/KEE.

Gjatë kësaj faze janë shqyrtuar propozimet dhe rekomandimet e pjesëmarrësve, me qëllim të përmirësimit të mëtejshëm të Projektligjit dhe forcimit të standardeve në fushën e sigurisë dhe shëndetit në punë. Pas shqyrtimit dhe harmonizimit të tyre, do të përcaktohen konkluzionet dhe rekomandimet për finalizimin e Projektligjit.

Procesi i konsultimeve vazhdon me të gjitha grupet e interesit.

11/09/2026

Përmbyllet punëtoria për finalizimin e Projekt-Rregullores për Masat Aktive të Tregut të Punës

Më 10 dhe 11 shtator 2026 u zhvillua punëtoria për hartimin dhe finalizimin e Projekt-Rregullores për Masat Aktive të Tregut të Punës.

Përmes Projekt-Rregullores synohet krijimi i një qasjeje më të efektshme dhe më të targetuar ndaj personave të papunë dhe punëkërkuesve, duke mundësuar përfshirjen e tyre më të madhe dhe më të qëndrueshme në tregun e punës.

Përmes diskutimit të propozimeve dhe përcaktimit të përmbajtjes përfundimtare, punëtoria kontribuoi në finalizimin dhe harmonizimin e mëtejshëm të Projekt-Rregullores.

I pranishëm ishte edhe Ministri për Punë, Familje dhe Vlera të Luftës Çlirimtare, z. Andin Hoti, i cili theksoi nevojën për avancimin e politikave aktive të punësimit dhe krijimin e mekanizmave më efikasë për mbështetjen e punëkërkuesve dhe integrimin e tyre në tregun e punës.

Finalizimi i Projekt-Rregullores për Masat Aktive të Tregut të Punës krijon bazën për një qasje më të strukturuar në zbatimin e masave të punësimit dhe për rritjen e mundësive të përfshirjes së punëkërkuesve në tregun e punës.

07/09/2026

Lansohet Udhëzuesi për Profilizimin, Vlerësimin e Nevojave dhe Fuqizimin e Vazhdueshëm të Familjeve në Skemën e Ndihmës Sociale

Qëllimi i Udhëzuesit është të standardizojë mënyrën e punës, të sigurojë trajtim të barabartë, të qartësojë përgjegjësitë dhe të krijojë lidhje funksionale ndërmjet Skemës së Ndihmës Sociale, Qendrave për Punë Sociale, Agjencisë së Punësimit, komunave dhe ofruesve të tjerë të shërbimeve.

Hartimi është iniciuar nga Ministria për Punë, Familje dhe Vlerat e Luftës Çlirimtare, përkatësisht nga Departamenti i Skemave Sociale, në kuadër të procesit të profilizimit të familjeve përfituese të Skemës së Ndihmës Sociale dhe vlerësimit të nevojave të tyre.

Udhëzuesi është hartuar në kuadër të projektit “Drejtësia sociale për Romët, Ashkalinjtë dhe Egjiptianët në Kosovë”, i implementuar nga Terre des hommes Lausanne në Kosovë, në partneritet me Zërin e Romëve, Ashkalinjve dhe Egjiptianëve (VoRAE) dhe Swiss Church Aid (HEKS/EPER), me mbështetjen e Agjencisë Zvicerane për Zhvillim dhe Bashkëpunim (SDC).