Ministria e Mjedisit, Planifikimit Hapësinor dhe Infrastrukturës

29/09/2026

MMPH dhe Agjencia për Informim dhe Privatësi forcojnë bashkëpunimin për transparencë institucionale

Zëvendësministri i Ministrisë së Mjedisit dhe Planifikimit Hapësinor, Driton Hyseni, ka nënshkruar Memorandum Bashkëpunimi me drejtoreshën e Agjencisë për Informim dhe Privatësi, Krenare Sogojeva, me qëllim të forcimit të transparencës dhe llogaridhënies institucionale.

Ky memorandum është pjesë e zotimeve të institucioneve në kuadër të Planit të Veprimit të Partneritetit për Qeverisje të Hapur 2026–2028, me fokus në publikimin proaktiv të dokumenteve dhe informacioneve publike, si dhe standardizimin dhe përmirësimin e qasjes së qytetarëve në to.

Përmes këtij bashkëpunimi synohet të rritet transparenca e MMPH-së, të lehtësohet qasja e qytetarëve në informata publike dhe të forcohet llogaridhënia përmes publikimit të rregullt dhe të standardizuar të dokumenteve dhe informacioneve me interes publik.

Ministria e Mjedisit dhe Planifikimit Hapësinor mbetet e përkushtuar në zbatimin e obligimeve ligjore dhe në avancimin e transparencës si parim themelor të qeverisjes së hapur.

29.09.2026
Ministria e Mjedisit dhe Planifikimit Hapësinor

29/09/2026

Kosova po planifikon Vizionin Hapësinor përtej vitit 2050!

Më 15 tetor, ditë e enjte, Ministria e Mjedisit dhe Planifikimit Hapësinor me mbështetjen e GIZ-it, organizon Simpoziumin Ndërkombëtar “Vizioni Hapësinor i Kosovës 2050”.

Ky është një simpozium i rëndësishëm për të diskutuar se si duam të duket dhe të zhvillohet Kosova në dekadat e ardhshme.

Në Prishtinë do të mblidhen arkitektë, urbanistë dhe ekspertë të dalluar nga vende të ndryshme të botës, përfshirë Holandën, Belgjikën, Finlandën, Zvicrën, Gjermaninë dhe vende të tjera.

Do të diskutojmë se si do t’i planifikojmë qytetet dhe fshatrat tona, si do t’i mbrojmë pasuritë dhe resurset natyrore dhe si do të krijojmë hapësira më funksionale, më të gjelbra dhe më të shfrytëzueshme për qytetarët.

Në panelet ndërkombëtare dhe lokale do të trajtojmë planifikimin hapësinor, zhvillimin urban dhe rural, tranzicionin e gjelbër, qytetet e mençura dhe reziliente, si dhe lagjet dhe komunitetet e qëndrueshme.

Ky simpozium zhvillohet në një moment shumë të rëndësishëm për Kosovën, kur po rishikohen në tërësi kornizat ligjore për Planifikimin Hapësinor, Ndërtimin dhe Banimin, si dhe për Parqet Kombëtare. Njëkohësisht, po hartohet Plani i ri Hapësinor i Kosovës dhe Strategjia Kombëtare e Banimit.

23/09/2026

THIRRJA PËR APLIKIM!

Për Skemën e Subvencioneve për Start-up dhe Ndërmarrje për Riciklim dhe Ekonomi Qarkore

Qëllimi i thirrjes

Ministria e Mjedisit dhe Planifikimit Hapësinor fton start-up-et dhe ndërmarrjet e vogla të regjistruara në Republikën e Kosovës të aplikojnë për mbështetje financiare për ide dhe projekte të lidhura drejtpërdrejt me mbeturinat, riciklimin dhe ekonominë qarkore.

Për t'u informuar dhe Aplikuar klikoni në linkun e më poshtëm!

https://mmphi.rks-gov.net/Document/Announcements?type=1

07/09/2026

04/09/2026

FILLON HARTIMI DHE HARMONIZIMI I AKTEVE NËNLIGJORE PËR BANIM SOCIAL DHE TË PËRBALLUESHËM

Ministria e Mjedisit dhe Planifikimit Hapësinor, përmes Departamentit për Planifikim Hapësinor, Ndërtim dhe Banimit – Divizionit të Banimit, me mbështetjen e Misionit të OSBE-së në Kosovë, zhvilloi dy punëtori treditore, të mbajtura më 24–26 gusht dhe 1–3 shtator 2026, të dedikuara për shqyrtimin, diskutimin dhe harmonizimin e gjashtë akteve nënligjore që burojnë nga Ligji Nr. 10/L-022 për Banimin Social dhe të Përballueshëm.

Gjatë ciklit gjashtëditor u shqyrtuan dhe u diskutuan këto akte nënligjore për:

- Menaxhimin e stokut të njësive të banimit social dhe qirasë në njësitë e banimit në pronësi publike dhe private;

- Kriteret për përfituesit nga programet e banimit për familjet dhe individët;

- Përmbajtjen e thirrjeve publike, kriteret e përshtatshmërisë, dokumentacionin e nevojshëm, aplikimin, vlerësimin dhe përzgjedhjen e përfituesve dhe punën e Komisionit të Vlerësimit;

- Organizimin e brendshëm dhe funksionimin e pozitave të punës të Agjencisë së Kosovës për Banime;

- Formatin dhe përmbajtjen e Dokumentit të Profilit të Banimit dhe Planit Komunal të Banimit;

- Kriteret dhe procedurat për përfitim nga Programi i Banimit të Përballueshëm.

Ky proces gjashtëditor përbën një hap të rëndësishëm drejt avancimit të kornizës ligjore dhe institucionale për zhvillimin e politikave dhe programeve të banimit social dhe të përballueshëm në Kosovë.

MMPH falënderon të gjithë pjesëmarrësit për kontributin, angazhimin dhe bashkëpunimin e tyre, për mbështetjen e ofruar në realizimin e këtij procesi. |Përballueshëm Banim

29/08/2026

Ndalohen punimet e 7 gurthyesve, kurse 3 operatorë të tjerë të gurthyesve janë gjobitur më 7 mijë euro për mosrespektim të standardeve të përcaktuara mjedisore.

7 gurthyesve u ndalohen punimet, ndërsa 3 të tjerë gjobiten me 7 mijë euro!

Inspektorati i Mjedisit ka ndaluar punimet në 7 gurthyes që kanë operuar në kundërshtim me rregullat dhe kushtet ligjore, ndërsa 3 operatorë të tjerë janë gjobitur me 7 mijë euro për shkeljet e evidentuara. Masat janë ndërmarrë pas inspektimeve në Gjilan, Han të Elezit, Shtime, Suharekë, Mitrovicë, Viti, Lipjan dhe Prishtinë.

Procesi i verifikimit të gurthyesve ka nisur në mars, kur të gjithë operatorëve u është dhënë afat prej 15 ditësh për të dëshmuar përputhshmërinë me ligjin dhe kriteret mjedisore. Rreth 200 gurthyes kanë dorëzuar dokumentacionin, i cili është shqyrtuar nga një komision i jashtëm i angazhuar nga Ministria në prill. Një pjesë e konsiderueshme e tyre nuk i kanë përmbushur kriteret ligjore.

Vetëm gjatë muajit gusht, punimet u janë ndaluar 16 gurthyesve.

Inspektorati i Mjedisit është çdo ditë në terren dhe kontrollet do të vazhdojnë. Ndaj çdo operatori që vepron në kundërshtim me ligjin, ndot mjedisin apo nuk përmbush standardet e përcaktuara, do të ndërmerren masat ndëshkuese.

Mbrojtja e mjedisit, tokës, ujit dhe ajrit është e pakompromis. Nuk do të lejojmë që përfitimi i askujt të vihet mbi shkatërrimin e mjedisit të Kosovës.