Ministria e Mjedisit, Planifikimit Hapësinor dhe Infrastrukturës

31/07/2026

24/07/2026

Po fillon rehabilitimi i zonave të degraduara në pellgun e Drinit të Bardhë!

Ministrja e Mjedisit dhe Planifikimit Hapësinor, znj.Fitore Pacolli sot ka nënshkruar Memorandumin e Mirëkuptimit me CNVP-në, duke shënuar fillimin e një partneriteti të rëndësishëm për rehabilitimin e zonave të degraduara në pellgun e lumit Drini i Bardhë.

Ky bashkëpunim synon të forcojë menaxhimin e qëndrueshëm të pyjeve, të rikthejë ekosistemet e dëmtuara dhe të kontribuojë në mbrojtjen afatgjatë të burimeve natyrore të Kosovës.

Në kuadër të projektit do të:
🌱 Rehabilitohen mbi 5 hektarë tokë të degraduar.
🌳 Realizohen mbjellje të reja për ripyllëzimin e zonave të dëmtuara.
🦋 Forcohet mbrojtja e biodiversitetit dhe ekosistemeve natyrore.
👥 Rritet ndërgjegjësimi i qytetarëve dhe komuniteteve lokale për rëndësinë e pyjeve dhe mbrojtjes së mjedisit.

24.07.2026
Ministria e Mjedisit dhe Planifikimit Hapësinor

24/07/2026

Për Ministrinë e Mjedisit dhe Planifikimit Hapësinor, mbrojtja e resurseve ujore përbën një prioritet strategjik kombëtar, ndaj ruajtja e pronave ujore është vendosur në qendër të angazhimit tonë institucional.

Prandaj kemi nisur trajtimin e menjëhershëm të kërkesave nga institucionet dhe ndërmarrjet publike për lirimin e të gjitha pronave ujore të uzurpuara apo të tjetërsuara jashtligjshëm.

​Ky përkushtim strategjik për mbrojtjen e ujërave po zbatohet me të njëjtin vendosmëri në të gjithë territorin e Republikës së Kosovës.

​Aksioni i fundit në zonën e Liqenit të Ujmanit, ku me asistimin e Inspektoratit të MMPH-së dhe Policisë së Kosovës u rrënuan 16 objekte të ndërtuara pa leje në pronat ujore nën administrimin e N.P. "Ibër-Lepenci", është vetëm një nga hapat e këtij plani. Të gjitha palët e përfshira në këtë aksion ishin njoftuar paraprakisht në përputhje të plotë me procedurat ligjore.

​Në kuadër të të njëjtit prioritet strategjik, po shqyrtohen me intensitet të lartë edhe kërkesat e tjera institucionale që lidhen me uzurpimet dhe ndërtimet pa leje sidomos rreth Liqenit të Batllavës dhe Liqenit të Badovcit, dy burime kyçe të furnizimit me ujë të pijshëm për qytetarët tanë.

Inspektorati i MMPH-së po vijon identifikimin e plotë të shkeljeve në këto zona dhe, sapo të përfundojë ky proces, do të ndërmerren masa të menjëhershme ligjore për rikthimin e këtyre hapësirave në funksion të interesit publik.
​
Njëkohësisht, Inspektorati po vazhdon monitorimin e rreptë të të gjitha zonave të mbrojtura dhe parqeve kombëtare. Ministria e Mjedisit dhe Planifikimit Hapësinor mbetet e palëkundur në misionin e saj: përmes zbatimit të ligjit dhe bashkëpunimit ndërinstitucional, do të mbrojmë çdo resurs ujor dhe natyror të Republikës së Kosovës nga çdo formë e uzurpimit apo ndërtimit të paligjshëm.

24.07.2026
Ministria e Mjedisit dhe Planifikimit Hapësinor

17/07/2026

Shkëputën kontratat e punës për 20 zyrtarë të MMPH-së

Ministrja e Mjedisit dhe Planifikimit Hapësinor, znj.Fitore Pacolli ka njoftuar se është nxjerrë vendim për shkëputjen e kontratave të punës për 20 zyrtarë të MMPH-së nga komuniteti serb, të njohur edhe si pjesë e ish-“Mbrojtjes Civile”. Shkëputja e kontratave vjen si pasojë e mungesës së vazhdueshme të tyre në vendin e punës, si dhe në përputhje me rekomandimet e Zyrës Kombëtare të Auditimit.

Ministrja Pacolli tha se “Nga evidencat zyrtare ka rezultuar se këta zyrtarë, të punësuar që nga 5 janari 2016 në Ministrinë e Mjedisit dhe Planifikimit Hapësinor, nuk kanë përmbushur detyrimet që rrjedhin nga marrëdhënia e punës, përfshirë mungesën e vazhdueshme në vendin e punës dhe mosrespektimin e detyrave të punës. Do të vendosim ligjshmëri të plotë dhe standarde të njëjta për secilin në administratën publike. Askush nuk mund të mbajë statusin e të punësuarit pa përmbushur detyrimet që i takojnë. Do të jemi të pakompromis në zbatimin e ligjit, pa dallim përkatësie apo pozite, sepse shërbimi publik duhet t’u shërbejë qytetarëve me përgjegjësi dhe respektim të plotë të detyrës zyrtare”.

17.07.2026
Ministria e Mjedisit dhe Planifikimit Hapësinor

16/07/2026

Masat për garantimin e konsultimit publik në procedurat e Pëlqimit Mjedisor

Ministrja e Mjedisit dhe Planifikimit Hapësinor, znj. Fitore Pacolli njofton se është nxjerrë vendim për rikthimin në procedurë të të gjitha rasteve për Pajisje me Pëlqim Mjedisor, në të cilat procesi i konsultimit publik nuk i ka përmbushur standardet e përcaktuara me legjislacionin në fuqi.

Me këtë vendim:

-Rikthehen në procedurë të gjitha lëndët ku Raporti i Vlerësimit të Ndikimit në Mjedis (VNM) nuk ka qenë i qasshëm për publikun ose nuk janë respektuar procedurat ligjore të konsultimit publik.
-Nuk do të lëshohet asnjë Pëlqim Mjedisor pa u zhvilluar një proces i rregullt, transparent dhe gjithëpërfshirës i konsultimit publik.
-Pas përsëritjes së procedurës dhe sigurimit të qasjes në Raportin e VNM-së, operatori ekonomik, përkatësisht përpiluesi i VNM-së, obligohet të zhvillojë forma shtesë të konsultimit publik përmes komunikimit fizik ose elektronik me përfaqësuesit e komunitetit, duke e dokumentuar këtë proces gjatë aplikimit ose riaplikimit për Pajisje me Pëlqim Mjedisor.

Ky vendim synon të forcojë transparencën, llogaridhënien dhe zbatimin e standardeve ligjore, duke garantuar një proces të drejtë dhe gjithëpërfshirës të vendimmarrjes në çështjet mjedisore.

16.07.2026
Ministria e Mjedisit dhe Planifikimit Hapësinor

11/07/2026

Parandalimi i zjarreve në pyje dhe hamullore është përgjegjësi e përbashkët për mbrojtjen e mjedisit!

Temperaturat e larta dhe tharja e bimësisë rrisin rrezikun e zjarreve, të cilat dëmtojnë pyjet, biodiversitetin, tokën dhe cilësinë e ajrit. Djegia e hamulloreve shkatërron pjellorinë e tokës dhe cenon ekuilibrin natyror.

Prandaj:

Mos digjni hamullore dhe mbetje bujqësore.
Mos ndizni zjarre në natyrë.
Mos hidhni cigare në pyje apo ambiente të hapura.
Raportoni menjëherë çdo zjarr.
Të mbrojmë pyjet, tokën dhe natyrën tonë.
Çdo veprim i vogël ndihmon mjedisin!

09/07/2026

44 milionë euro grante për mjedisin dhe klimën në Kosovë nga Bashkimi Evropian.

09/07/2026

IHMK bëhet pjesë e programeve të EUMETNET-it!

Instituti Hidrometeorologjik i Kosovës (IHMK), në kuadër të Agjencisë për Mbrojtjen e Mjedisit të Kosovës (AMMK), ka nënshkruar Marrëveshjen e Bashkëpunimit me EUMETNET, rrjetin evropian të Shërbimeve Kombëtare Meteorologjike dhe Hidrologjike. Kjo marrëveshje shënon një hap të rëndësishëm drejt integrimit të IHMK-së në komunitetin profesional evropian dhe krijon mundësi të reja për modernizimin e shërbimeve meteorologjike dhe klimatike në Kosovë.

Në kuadër të marrëveshjes, IHMK do të marrë pjesë në programet OPERA, E-WFC (C-SRNWP dhe E-Nowcasting), Climate, EUMETCAL dhe Capacity Capability Area Management, duke përfituar nga shkëmbimi i të dhënave, ekspertizës, trajnimeve profesionale dhe praktikave më të mira evropiane.

Ky bashkëpunim do të kontribuojë në:
➢ Përmirësimin e parashikimeve meteorologjike;
➢ Zhvillimin e shërbimeve klimatike;
➢ Forcimin e sistemeve të paralajmërimit të hershëm;
➢ Ngritjen e kapaciteteve profesionale të IHMK-së;
➢ Harmonizimin e shërbimeve me standardet evropiane.

Ky është një zhvillim i rëndësishëm për forcimin e rolit të IHMK-së dhe për ofrimin e shërbimeve gjithnjë e më cilësore për qytetarët dhe institucionet e Republikës së Kosovës.

09.07.2026
Ministria e Mjedisit dhe Planifikimit Hapësinor

07/07/2026

Ministrja Pacolli zhvilloi takim me kryetarin e Lipjanit, Imri Ahmetin

Ministrja e Mjedisit dhe Planifikimit Hapësinor, znj.Fitore Pacolli e shoqëruar nga Zëvendësministri i parë, z.Avni Zogiani kanë zhvilluar takim me kryetarin e Komunës së Lipjanit, z.Imri Ahmeti dhe bashkëpunëtorët e tij, ku u diskutua për zgjidhjen afatgjatë të menaxhimit të mbeturinave në rajonin e Prishtinës.

Në takim u theksua nevoja për përcaktimin e një lokacioni të përshtatshëm për ndërtimin e një deponie moderne me komponentë të ndarjes dhe riciklimit të mbeturinave, si parakusht për modernizimin e sistemit të deponive dhe mbylljen e deponisë së Mirash*t.

Të dyja palët u dakorduan të bashkëpunojnë ngushtë për identifikimin e lokacionit më të përshtatshëm për realizimin e këtij projekti.

07.07.2026
Ministria e Mjedisit dhe Planifikimit Hapësinor