Agjencia e Trajtimit të Pronave

27/07/2026

📢 NJOFTIM I RËNDËSISHËM

Agjencia e Trajtimit të Pronave ka nisur dërgimin e njoftimeve për rreth 1.800 subjekte, dosjet e të cilëve kërkojnë plotësim dokumentacioni, në kuadër të vijimit të procesit të trajtimit për kompensim financiar.

📩 Nëse jeni një nga subjektet që ka marrë njoftim nga ATP, ju lutemi të paraqisni dokumentacionin e kërkuar brenda 60 ditëve nga data e marrjes së njoftimit.

⏳ Plotësimi i dokumentacionit brenda afatit të përcaktuar është i domosdoshëm për vijimin e trajtimit të dosjes.

🤝 ATP mbetet e angazhuar për përshpejtimin e procesit të shqyrtimit të dosjeve dhe ofrimin e një shërbimi transparent, efikas dhe në interes të qytetarëve.

23/07/2026

23/07/2026

📢 Interes i lartë nga qytetarët në dy ditët e para të nismës “Ditët e Hapura” në Agjencinë e Trajtimit të Pronave.

Gjatë dy ditëve të para të kësaj nisme, shumë qytetarë iu drejtuan ATP-së për të marrë informacion dhe asistencë juridike mbi dosjet e tyre, në një komunikim të drejtpërdrejtë me specialistët e institucionit.

🤝 Në takime mori pjesë edhe Drejtori i Përgjithshëm i ATP-së, Valdrin Pjetri, i cili theksoi rëndësinë e një administrate të hapur, transparente dhe sa më pranë qytetarëve.

✅ Nisma “Ditët e Hapura” do të vijojë çdo javë, duke ofruar komunikim të drejtpërdrejtë, asistencë juridike dhe shërbim cilësor për çdo qytetar.

22/07/2026

Fjala e Ministrit të Drejtësisë gjatë konferencës për shtyp së mbajtur sot mbi prioritetet dhe objektivat e Agjencisë së Trajtimit të Pronave për gjashtëmujorin e dytë të vitit 2026, me fokus përshpejtimin e proceseve dhe përmirësimin e shërbimeve ndaj qytetarëve.

22/07/2026

📌 Një ndër problematikat që has Agjencia e Trajtimit të Pronave gjatë procesit të disbursimit të kompensimit financiar lidhet me llogaritë bankare të mbyllura ose joaktive të subjekteve përfituese. Në shumë raste, transfertat rikthehen në ATP, duke sjellë vonesa në këtë proces.

🤝 Për të adresuar këtë problematikë, Drejtori i Përgjithshëm i ATP-së, Valdrin Pjetri, së bashku me stafin drejtues të institucionit, zhvilluan një takim pune me Shoqatën Shqiptare të Bankave dhe përfaqësues të bankave të nivelit të dytë, me synim gjetjen e zgjidhjeve konkrete.

✅ Gjatë takimit u dakordësua vendosja e mekanizmave efektivë të koordinimit dhe komunikimit me bankat e nivelit të dytë, për të trajtuar në kohë këto raste dhe për të shmangur vonesat në procesin e kompensimit financiar.

🔹 ATP mbetet e angazhuar për garantimin e një procesi kompensimi sa më të shpejtë, transparent dhe efikas në shërbim të qytetarëve.

20/07/2026

📢 NJOFTIM

NISMA “DITËT E HAPURA” NË AGJENCINË E TRAJTIMIT TË PRONAVE

Në kuadër të rritjes së transparencës dhe përmirësimit të komunikimit me qytetarët, Agjencia e Trajtimit të Pronave nis iniciativën “Ditët e Hapura”, duke u ofruar qytetarëve informacion dhe asistencë të drejtpërdrejtë për dosjet e tyre.

🗓 Çdo të mërkurë | 09:00–12:00
📍 Drejtoria e Kompensimit

🗓 Çdo të enjte | 09:00–12:00
📍 Drejtoria e Trajtimit të Kërkesave për Njohje Pronësie

📌 Ju mirëpresim pranë ambienteve të Agjencisë së Trajtimit të Pronave, sipas ditëve dhe orareve të përcaktuara.

17/07/2026

🇪🇺 Raporti i Sundimit të Ligjit 2026 konfirmon rezultatet e reformës në drejtësi

Reforma në drejtësi po jep rezultate. Raporti i Sundimit të Ligjit 2026 i Komisionit Evropian vlerëson përfundimin e procesit të rivlerësimit kalimtar, rezultatet në luftën kundër korrupsionit, forcimin e integritetit, transparencës dhe llogaridhënies në sistemin e drejtësisë, përmirësimin e eficiencës së sistemit gjyqësor dhe avancimin e përafrimit të Shqipërisë me standardet e Bashkimit Evropian.

Njëkohësisht, raporti evidenton dhe sfidat që mbeten: rritjen e mëtejshme të eficiencës së sistemit gjyqësor, plotësimin e kapaciteteve njerëzore, përfundimin e digjitalizimit të drejtësisë, forcimin e konsultimit publik dhe vijimin e masave për parandalimin dhe luftën kundër korrupsionit.

Çdo vlerësim pozitiv është një nxitje për të ecur përpara, ndërsa çdo rekomandim është një mundësi për t'u përmirësuar. Kështu ndërtohet një drejtësi më e fortë dhe kështu afrohet Shqipëria çdo ditë më shumë me Bashkimin Evropian. 🇦🇱🇪🇺