15/06/2026
ചാവക്കാട് നഗരസഭയുടെ 'മധുവനം' പദ്ധതിക്ക് തുടക്കമായി
പ്രകൃതിസൗഹൃദ അന്തരീക്ഷം സൃഷ്ടിക്കുന്നതിനും നാട്ടുഫലവൃക്ഷങ്ങളെ വരുംതലമുറയ്ക്കായി സംരക്ഷിക്കുന്നതിനുമായി ചാവക്കാട് നഗരസഭ ആവിഷ്കരിച്ച 'മധുവനം' പദ്ധതിക്ക് ഔദ്യോഗിക തുടക്കമായി. നഗരസഭയുടെ നേതൃത്വത്തിൽ ഫലവൃക്ഷങ്ങൾ നട്ടുപിടിപ്പിക്കുന്ന ഈ പദ്ധതിയുടെ ഉദ്ഘാടനം ജില്ലാ അസിസ്റ്റന്റ് കളക്ടർ പ്രീതി എ.സി (IAS) നിർവഹിച്ചു.
പ്രശസ്തമായ 'ആയുർ ജാക്ക്' ചക്കപ്പഴത്തിന്റെ ഉപജ്ഞാതാവും സംസ്ഥാന ഭൂജല വകുപ്പ് ബോർഡ് അംഗവും ഐക്യരാഷ്ട്രസഭയുടെ അവാർഡ് ജേതാവുമായ വർഗീസ് തരകൻ ചടങ്ങിൽ വിശിഷ്ട സാന്നിധ്യമായി. നഗരസഭ ചെയർപേഴ്സൺ എ.എച്ച്. അക്ബർ അധ്യക്ഷത വഹിച്ചു. വൈസ് ചെയർപേഴ്സൺ ബിൻസി സന്തോഷ് സ്വാഗതവും, സെക്രട്ടറി ഇൻ ചാർജ് റിഷ്മ പി.പി. നന്ദിയും രേഖപ്പെടുത്തി. വികസനകാര്യ സ്റ്റാൻഡിങ് കമ്മിറ്റി ചെയർമാൻ പി. യതീന്ദ്രദാസ്, ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ ലിഷാ മത്രംകോട്ട്, ആരോഗ്യകാര്യ സ്റ്റാൻഡിങ് കമ്മിറ്റി ചെയർമാൻ കെ.എച്ച്. സലാം, മുൻ ചെയർപേഴ്സനും നഗരസഭ കൗൺസിലറുമായ ഷീജ പ്രശാന്ത് എന്നിവർ ആശംസകൾ നേർന്നു.
വഞ്ചിക്കടവ് പാർക്കിനോട് ചേർന്നുള്ള പ്രദേശത്തും മിനി വാഗമണ്ണിലും നടപ്പിലാക്കുന്ന 'മധുവനം' പദ്ധതിയിൽ ജനപ്രതിനിധികളും സ്കൂൾ വിദ്യാർത്ഥികളും പരിസ്ഥിതി പ്രവർത്തകരും ഉൾപ്പെടെ നിരവധി പേർ സജീവമായി പങ്കുചേർന്നു.
