03/08/2026
B’referenza għall-applikazzjoni tal-Ippjanar PC/00139/17 sabiex tiġi żviluppata biċċa mill-aħħar art verġni li fadal fil-lokalità tagħna ta’ Swatar/Imsida, il-Kumitat tal-Partit Laburista tal-Imsida qed joġġezzjona għal dan l-iżvilupp propost fi Triq Indri Grima, fin-naħa t’isfel tal-lokalità tagħna.
Din hija waħda mill-aħħar żoni miftuħa li fadal f’Swatar/Imsida, fejn ir-residenti u l-pubbliku jistgħu jimxu u jgawdu ambjent aktar naturali mingħajr ma jkunu mdawrin kompletament bil-bini. It-telf ta’ dan l-ispazju jkun ta’ detriment għall-karattru tal-lokalità u għall-kwalità tal-ħajja tar-residenti.
Barra minn hekk, ir-raba’ li jinsab fis-sit jaqdi funzjoni importanti fil-ġestjoni tal-ilma tax-xita, peress li jassorbi ammont sostanzjali ta’ ilma waqt maltempati u xita qawwija. Dan jgħin biex jitnaqqas il-volum tal-ilma li jinżel lejn Wied l-Imsida u b’hekk jitnaqqas ir-riskju ta’ problemi relatati mal-għargħar fl-inħawi.
Nappellaw lis-sens komun biex jipprevali u nitolbu lill-Awtorità tal-Ippjanar tirrifjuta din l-applikazzjoni fl-interess tar-residenti, tal-ambjent u tal-ġid komuni tal-lokalità tagħna.
Kumitat, Każin Partit Laburista Imsida
