14/09/2026
Më datë 8 shtator 2026, Drejtori i Përgjithshëm i INSTAT, Znj. Lantona Sado, mori pjesë në eventin e lancimit të iniciativës “WE Finance Code Initiative in Albania”, organizuar nga Banka e Shqipërisë dhe Banka Evropiane për Rindërtim dhe Zhvillim (EBRD).
Iniciativa synon të mbështesë zgjerimin e aksesit në financim për gratë sipërmarrëse dhe bizneset e drejtuara nga gratë, përmes forcimit të bashkëpunimit ndërinstitucional, përdorimit më të mirë të të dhënave të disagreguara sipas gjinisë dhe nxitjes së masave konkrete nga sektori publik dhe ai financiar. Në kuadër të eventit u prezantua gjithashtu MSME Data Dashboard për Shqipërinë, me të dhëna mbi kreditë dhe depozitat të disagreguara sipas gjinisë, si bazë për evidentimin e boshllëqeve dhe monitorimin e progresit.
Znj. Sado mori pjesë si paneliste në diskutimin “Supporting Women Entrepreneurship through the WE Finance Code”, së bashku me përfaqësues të Bankës së Shqipërisë dhe sektorit bankar. Në ndërhyrjet e saj, ajo u fokusua në rolin e statistikave dhe të dhënave cilësore në mbështetjen e politikbërjes, në rëndësinë e përdorimit të të dhënave të disagreguara sipas gjinisë për identifikimin e problematikave dhe nevojave të bizneseve të drejtuara nga gratë, si dhe në nevojën për bashkëpunim më të ngushtë ndërmjet institucioneve për të siguruar që të dhënat të përdoren jo vetëm për raportim, por edhe për vendimmarrje dhe matjen e progresit.
Diskutimi evidentoi rëndësinë e krijimit të një baze të përbashkët evidence ndërmjet institucioneve statistikore, rregullatoreve, bankave dhe politikbërësve, me qëllim që të dhënat të përkthehen në politika, produkte financiare dhe masa konkrete që mbështesin fuqizimin ekonomik dhe aksesin në financim të grave sipërmarrëse.
