Ministria e Shëndetësisë

19/06/2026

Kosova prezanton sukseset e Programit të Imunizimit në takimin global me Aleancën Gavi dhe UNICEF-in

Kopenhagë, 19 qershor 2026

Përfaqësues të Ministrisë së Shëndetësisë dhe Institutit Kombëtar të Shëndetësisë Publike të Kosovës (IKShPK) morën pjesë në punëtorinë e Aleancës Gavi, të organizuar nga UNICEF dhe Organizata Botërore e Shëndetësisë (OBSH), në Kopenhagë, ku prezantuan progresin dhe arritjet e Kosovës në fushën e imunizimit.

Gjatë takimit, delegacioni i Kosovës prezantoi rezultatet e arritura pas përfshirjes së tri vaksinave të reja: HPV, PCV dhe Rota në kalendarin e rregullt të vaksinimit, si dhe masat e ndërmarra për rritjen e mbulueshmërisë me vaksinim, fuqizimin e angazhimit me komunitetet dhe forcimin e kapaciteteve të ekipeve të vaksinimit.

Në vitin 2024, Kosova përditësoi kalendarin e rregullt të vaksinimit duke përfshirë këto tri vaksina të reja, duke kontribuar në parandalimin e sëmundjeve dhe avancimin e mëtejmë të shëndetit publik. Në mbështetje të këtyre përpjekjeve, gjatë viteve të fundit buxheti për prokurimin e vaksinave është rritur gjashtë herë, duke arritur në 6 milionë euro.

Në kuadër të vizitës, u zhvilluan gjithashtu takime bilaterale me partnerë strategjikë ndërkombëtarë për të diskutuar mundësitë e bashkëpunimit në forcimin e programeve të imunizimit dhe të shëndetit publik.

Delegacioni vizitoi edhe njësinë qendrore të furnizimit të UNICEF-it në Kopenhagë, ku u njoh nga afër me proceset e menaxhimit, furnizimit dhe shpërndarjes së vaksinave në nivel global.

Ministria e Shëndetësisë mbetet e përkushtuar për të garantuar vazhdimësinë dhe forcimin e mëtejshëm të Programit të Imunizimit, me qëllim mbrojtjen e shëndetit të çdo fëmije në Republikën e Kosovës dhe sigurimin e qasjes së barabartë në vaksina të sigurta dhe efektive.

14/06/2026

Dita Botërore e Dhurimit Vullnetar të Gjakut

“Dhuro gjak, dhuro jetë”

11/06/2026

Ministri Vitia priti në takim përfaqësuesit e FAO-së

Prishtinë, 11 qershor 2026

Ministri i Shëndetësisë, Dr. Arben Vitia, priti në takim z. Raimund Jehle, Zëvendëspërfaqësues Rajonal i Organizatës së Kombeve të Bashkuara për Ushqim dhe Bujqësi (FAO) për Evropë dhe Azi Qendrore, si dhe z. Naser Krasniqi, përfaqësues i FAO-së në Kosovë.

Gjatë takimit u diskutua për bashkëpunimin ndërmjet Ministrisë së Shëndetësisë dhe FAO-së në fushat me interes të përbashkët, me theks të veçantë në qasjen “Një Shëndet” (One Health), përgatitjen dhe reagimin ndaj pandemive, promovimin e ushqyerjes së shëndetshme, sigurinë ushqimore dhe mbështetjen për kategoritë më të cenueshme të popullsisë.

Po ashtu, u diskutua edhe për projektin rajonal të financuar nga Fondi për Pandemitë, i cili zbatohet në bashkëpunim me institucionet e Kosovës, Shqipërisë dhe Maqedonisë së Veriut, me mbështetjen e FAO-së dhe Bankës Botërore.

Ministri Vitia falënderoi përfaqësuesit e FAO-së për mbështetjen dhe shprehu gatishmërinë për thellimin e mëtejmë të bashkëpunimit në funksion të mbrojtjes së shëndetit publik, promovimit të ushqimit të shëndetshme dhe forcimit të kapaciteteve për përballimin e sfidave të ardhshme shëndetësore.

11/06/2026

Nën moton “Dhuro gjak, dhuro jetë”, fillon Java e Dhurimit Vullnetar të Gjakut

Prishtinë, 11 qershor 2026

Me rastin e fillimit të Javës së Dhurimit Vullnetar të Gjakut, Ministrinë e Shëndetësisë, në bashkëpunim me Qendrën Kombëtare të Transfuzionit të Gjakut, ka nisur aktivitetet në kuadër të kësaj fushate humanitare.

Java e Dhurimit Vullnetar të Gjakut shërben si një mundësi për të rritur ndërgjegjësimin mbi rëndësinë jetike të dhurimit të gjakut, një akt humanitar që shpëton jetë dhe ndihmon në trajtimin e mijëra pacientëve që kanë nevojë për transfuzione gjaku.

Në kuadër të kësaj fushate, dhjetëra nëpunës të Ministrisë së Shëndetësisë iu përgjigjën pozitivisht thirrjes për të dhuruar gjak, duke dhënë një kontribut të çmuar në sigurimin e rezervave të nevojshme për pacientët në nevojë.

Dhurimi vullnetar i gjakut mbetet burimi më i sigurt dhe më i qëndrueshëm për furnizimin e institucioneve shëndetësore me gjak dhe produkte të gjakut. Përmes këtij veprimi humanitar, qytetarët japin një kontribut të drejtpërdrejtë në shpëtimin e jetëve dhe në forcimin e sistemit shëndetësor.

Ministria e Shëndetësisë dhe Qendra Kombëtare e Transfuzionit të Gjakut shprehin mirënjohjen për të gjithë dhuruesit vullnetarë dhe i ftojnë qytetarët që t’i bashkohen kësaj nisme humanitare, duke dhuruar gjak dhe duke ndihmuar në sigurimin e sasive të mjaftueshme për pacientët që kanë nevojë për transfuzion.

Dhurimi i gjakut është një akt i thjeshtë, i sigurt dhe human. Një dhurim i vetëm mund të shpëtojë disa jetë

10/06/2026

Java e Dhurimit Vullnetar të Gjakut
(11–18 qershor 2026)

"DHURO GJAK, DHURO JETË"

30/05/2026

29/05/2026

Shënohet Dita Botërore pa Duhan: Të rinjtë sensibilizohen për rreziqet e duhanit dhe produkteve të nikotinës

Shënohet Dita Botërore pa Duhan nën moton: “Zbulimi i joshjes – luftimi i varësisë nga nikotina dhe duhani”, Ministria e Shëndetësisë / Instituti Kombëtar i Shëndetësisë Publike të Kosovës, në bashkëpunim me Ministrinë e Arsimit dhe Shkencës, si dhe me drejtoritë komunale të arsimit, sot ka zhvilluar një aktivitet ndërgjegjësues me rastin e shënimit të Ditës Botërore pa Duhan, e cila çdo vit shënohet më 31 maj.

Ky aktivitet kishte për qëllim ngritjen e vetëdijes tek të rinjtë dhe qytetarët për pasojat e dëmshme të përdorimit të duhanit dhe produkteve të nikotinës, duke promovuar rëndësinë e një jetese të shëndetshme dhe pa varësi.

Përmes këtij organizimi u synua sensibilizimi i komunitetit mbi ndikimin negativ që këto produkte kanë në shëndet, sidomos tek gjeneratat e reja, si dhe inkurajimi i tyre për të zgjedhur mënyra më të shëndetshme jetese.

Aktiviteti u pasurua me ndarjen e çmimeve për nxënësit pjesëmarrës në garën me punime me mesazhe kundër duhan pirjes dhe me ekspozimin e punimeve të realizuara nga ana e tyre, të përcollën mesazhe vetëdijësuese dhe kreative kundër përdorimit të duhanit dhe nikotinës.

Le të ndërtojmë së bashku një shoqëri më të shëndetshme duke zgjedhur jetën pa duhan dhe pa nikotinë. Çdo vendim i sotëm për shëndetin është një investim për të ardhmen tonë dhe të brezave që vijnë.

15/05/2026

Ministria e Shëndetësisë shpreh pikëllim për ndarjen nga jeta të ish Ministrit të Shëndetësisë, Prof. Dr. Alush Gash*t.

Në këto momente të vështira, i shprehim ngushëllimet më të sinqerta familjes Gashi, miqve, kolegëve dhe gjithë atyre që patën fatin ta njohin dhe të bashkëpunojnë me të.

Prof. Dr. Alush Gashi do të kujtohet me respekt për kontributin e tij në sistemin shëndetësor dhe në edukimin e brezave të mjekëve.

Qoftë i përjetshëm kujtimi për të.

14/05/2026

Ministria e Shëndetësisë ndan përvojën e saj në financimin e shërbimeve për nënat dhe fëmijët në forumin rajonal të UNICEF-it

Ministria e Shëndetësisë mori pjesë në takimin ndër-rajonal të organizuar nga UNICEF në Sofja, i cili iu kushtua programit të financimit të sistemeve të vizitave në shtëpi për nënat dhe fëmijët nga mosha 0 deri në 3 vjeç, si dhe ndërhyrjeve në fëmijërinë e hershme.

Gjatë këtij takimi u diskutuan praktikat më të mira dhe modelet e financimit të shërbimeve të vizitave në shtëpi për nënat dhe fëmijët, me fokus të veçantë në qëndrueshmërinë financiare dhe planifikimin afatgjatë të këtyre programeve.

Në këtë kontekst, rezultatet e arritura nga Kosova në këtë fushë u vlerësuan si ndër më të mirat në rajon, veçanërisht për stabilitetin dhe vazhdimësinë e financimit të këtyre shërbimeve.

Pjesëmarrja në këtë takim përbën një mundësi të rëndësishme për shkëmbim përvojash, forcim të bashkëpunimit rajonal dhe avancim të mëtejshëm të politikave dhe shërbimeve që mbështesin zhvillimin e hershëm të fëmijëve dhe mirëqenien e familjeve në vend.

13/05/2026

Java e Ndërgjegjësimit për Shëndetin Mendor - 11 - 17 maj 2026

Me rastin e shënimit të Javës së Ndërgjegjësimit për Shëndetin Mendor, Ministria e Shëndetësisë ka mbajtur sot një tryezë të rrumbullakët, si pjesë e aktiviteteve që synojnë rritjen e vetëdijes për rëndësinë e shëndetit mendor dhe fuqizimin e shërbimeve në këtë fushë.

Kjo tryezë bashkon përfaqësues institucionalë, profesionistë të shëndetit dhe akterë relevantë, me qëllim diskutimin e sfidave aktuale dhe identifikimin e mundësive për përmirësimin e shërbimeve të shëndetit mendor në vend. Përmes këtij aktiviteti synohet forcimi i bashkëpunimit ndërinstitucional dhe avancimi i politikave në këtë fushë me rëndësi të veçantë për shoqërinë.

Java e Ndërgjegjësimit për Shëndetin Mendor ka një rëndësi të veçantë, pasi synon të promovojë kujdesin për shëndetin mendor, parandalimin e problemeve të shëndetit mendor dhe uljen e stigmës ndaj personave që përballen me sfida të tilla, duke inkurajuar një qasje më gjithëpërfshirëse dhe mbështetëse në shoqëri.

Në këtë frymë, Ministria e Shëndetësisë fton qytetarët që të kujdesen për shëndetin e tyre mendor, të kërkojnë ndihmë pa hezitim kur kanë nevojë dhe të kontribuojnë në krijimin e një shoqërie më të hapur, mbështetëse dhe gjithëpërfshirëse.