20/08/2026
ALAMIN | Proseso ng Suspensyon ng Klase at Trabaho
Ang suspensyon ng klase at trabaho ay nakabatay sa siyentipikong impormasyon, pagsusuri sa bantang panganib, at koordinasyon ng iba't ibang ahensya ng pamahalaan.
Nagsisimula ang proseso sa pagbibigay ng mahahalagang impormasyon gaya ng weather forecast, volcano bulletin, earthquake information, at risk assessment mula sa mga science agency tulad ng DOST-PAGASA, DOST-PHIVOLCS, at DENR-Mines and Geosciences Bureau (MGB).
Ang mga impormasyong ito ay tinatalakay din sa Pre-Disaster Risk Assessment (PDRA) meetings kasama ang mga ahensyang kabilang sa National Disaster Risk Reduction and Management Council (NDRRMC). Dito sinusuri ang mga posibleng epekto at senaryo na maaaring idulot ng bantang panganib.
Batay sa resulta ng risk assessment, naghahanda ang Office of Civil Defense (OCD), bilang implementing arm at Secretariat ng NDRRMC, ng ulat at kinakailangang rekomendasyon hinggil sa suspensyon. Isinasaalang-alang dito ang siyentipikong datos, antas ng panganib, at mga posibleng senaryo.
Ang rekomendasyon ay isinusumite sa Tanggapan ng Pangulo para sa pag-apruba ng suspensyon, gayundin ng pagpapatupad ng alternative work arrangements sa mga tanggapan ng pamahalaan at alternative learning modalities sa ilalim ng superbisyon ng Department of Education.
Samantala, maaari ring ipatupad ang pagkansela o suspensyon ng klase at/o trabaho sa mga tanggapan ng pamahalaan sa iba pang lugar batay sa desisyon ng kani-kanilang Local Chief Executive, alinsunod sa mga umiiral na batas, alituntunin, at regulasyon.
Para naman sa pribadong sektor, ang suspensyon ng trabaho o pagpapatupad ng alternative work arrangements ay ipinauubaya sa pagpapasya ng kani-kanilang pamunuan.
Mahalagang paglilinaw: Ang pagpapasya sa suspensyon ng klase o trabaho ay resulta ng koordinasyon ng iba't ibang ahensya at nakabatay sa siyentipikong impormasyon, pagsusuri sa panganib, at mga natukoy na senaryo na maaaring idulot ng bantang panganib.
