25/09/2026
Agjencia e Menaxhimit Emergjent/MPB mbajti takimin e parë me komunat pjesëmarrëse në projektin KOMOAL-PREP.
Prishtinë, 25.09.2026
Të ftuarit e Agjencisë së Menaxhimit Emergjent/MPB, përkatësisht personat përgjegjës për zbatimin e projektit KOMOAL-PREP nga komunat përfituese, u paraqitën dje në selinë e Agjencisë, ku të pranishmëve i’u prezantuan udhëzimet hyrëse dhe njoftimet e përgjithshme për projektin e financuar nga Komisioni Evropian, DG ECHO.
Gjatë prezantimit të projektit para përfaqësuesve të komunave, me një fjalë rasti i’u drejtua të pranishmëve u.d drejtori ekzekutiv, z. Shefki Abdullahu, i cili i falënderoi pjesëmarrësit për çasjen dhe gatishmërinë e tyre për zbatimin e objektivave të projektit.
Ndërsa pjesëmarrësit, të autorizuar nga kryetarët e komunave të Prizrenit, Gjakovës, Deçanit, Junikut, Pejës dhe Istogut, stafi i Agjencisë, në cilësinë e menaxherit të projektit, i paraqiti në pika të shkurtra qëllimin e projektit ndërkufitar me Shqipërinë dhe Malin e Zi. Ky projekt synon rritjen e kapaciteteve në nivel lokal në aspektin e gatishmërisë dhe parandalimit, për qëndrueshmëri përballë rrezikut nga zjarret në sipërfaqe të hapura dhe malore në brezin kufitar ndërshtetëror Kosovë-Shqipëri–Mal i Zi.
Përtej qëllimit kryesor të projektit dyvjeçar, zbatimi i të cilit ka filluar me vlerësimet paraprake të gjendjes, bazuar në të gjeturat do të bëhen përpjekje të përbashkëta për përmirësimin e vlerësimit të rrezikut nga zjarret, ushtrimin e procedurave standarde operative dhe ngritjen e bashkëpunimit trepalësh në rastet kur zjarret shpërthejnë në brezin kufitar dhe ndihma reciproke paraqitet e domosdoshme.
Për të rritur koordinimin efektiv, të bazuar në aktet ligjore aty ku ato ekzistojnë, si dhe për inicimin e tyre aty ku mungojnë, përmes procedurave dhe protokolleve të njohura e të pranueshme për të trija shtetet, synohet eliminimi i barrierave dhe rritja e bashkëpunimit të koordinuar ndërshtetëror përmes komunave në brezin kufitar të të trijave shteteve.
Aktiviteti i sotëm përcolli mesazhin për seriozitetin e rreziqeve nga zjarret në sipërfaqe të hapura, e sidomos të atyre që rrezikojnë komunitetet ndërkufitare, për të cilat përgjegjësit kryesorë janë autoritetet vendore dhe qendrore të shteteve pjesëmarrëse.
Vazhdimësia do të pasojë me ngjarjen e radhës, e cila planifikohet të zhvillohet në Tiranë. Ky do të jetë një rast unik ku përfaqësuesit e 12 komunave ndërkufitare do të kenë mundësinë të ushtrojnë skenarë dhe të zhvillojnë diskutime përmes një ushtrimi në tryezë, i planifikuar për të identifikuar aspektet e paralajmërimit të hershëm dhe të veprimit të hershëm.
Agjencia e Menaxhimit Emergjent/MPB mbetet e përkushtuar të rrisë dhe zhvillojë kapacitetet në të dyja nivelet në vend, me qëllim të ruajtjes së jetës, mjedisit dhe të mirave materiale në Republikën e Kosovës.
