25/09/2026
Këshilli Ministror për Integrim Evropian diskuton për zbatimin e Planit të Rritjes
Nën kryesimin e Kryeministrit, z. Albin Kurti, sot u mbajt mbledhja e dytë e Këshillit Ministror për Integrim Evropian në funksionin e Komitetit Drejtues për Planin e Rritjes së Bashkimit Evropian, e cila është struktura koordinuese vendore në nivelin më të lartë politik. Në këtë mbledhje u diskutua për ecurinë e zbatimit të reformave prioritare dhe përgatitjen e projekteve investuese. Në mbledhje morën pjesë ministrat e udhëheqësit e institucioneve të tjera përgjegjëse për të këta komponentë.
Kryeministri Kurti theksoi se më 15 korrik Qeveria i ka dorëzuar Komisionit Evropian raportin e parë zyrtar për zbatimin e Agjendës së Reformave dhe kërkesën e parë për lirimin e fondeve nga Plani i Rritjes. Ai më tej tha se deri në fund të qershorit janë zbatuar plotësisht 20 hapa të reformave, që korrespondojnë me gjithsej rreth 153.3 milionë euro në fonde të BE-së, kurse reformat e tjera janë duke zbatuar. Ai njoftoi se Komisioni Evropian pritet të nxjerrë raportin përkatës në mesin e tetorit, më pas do ta miratojë vendimin për lirimin e fondeve.
Më pas, fjalën e mori Kryenegociatori i Republikës së Kosovës me BE-në dhe Koorinatori Kombëtar për Instrumentin për Reforma dhe Rritje, z. Jeton Zulfaj, i cili foli për reformat e zbatuara. Në fushën e qeverisjes, reformës së administratës publike dhe menaxhimit të financave publike është funksionalizuar ndërlidhja e sistemit të prokurimit elektronik dhe Sistemit Informativ për Menaxhimin e Financave të Kosovës, duke përmirësuar qëndrueshmërinë dhe transparencën e investimeve publike, pasi që tani asnjë institucion nuk mund të iniciojë aktivitet të prokurimit publik pa e zotuar buxhetin.
Në fushën e tranzicionit të gjelbër dhe atij digjital, ndër të tjera, është miratuar Udhërrëfyesi për Tranzicion të Drejtë energjetik, është funksionalizuar Ekipi Emergjent kombëtar dhe ai qeveritar për Reagim për Mbrojtje Kompjuterike dhe është arritur statusi i akredituar në Mekanizmin Evropian të Përdoruesve të Besueshëm të Teknologjisë Informative, dhe është arritur objektivi për shpërndarjen e rrjetit 5G në shtëpi në mbarë vendin.
Në fushën e zhvillimit të sektorit privat dhe mjedisit afarist, ndër të tjera, janë publikuar të dhënat për procedurat aktive të ristrukturimit dhe administratorët e falimentimit. Gjithashtu është përmirësuar qeverisja dhe transparenca e ndërmarrjeve publike përmes publikimit të të dhënave të përditësuara, themelimit të komiteteve të pavarura të auditimit dhe përmirësimit të llogaridhënies lidhur me adresimin e gjetjeve të auditimit të jashtëm, dhe arritjes së objektivit për zbatimin e rekomandimeve të auditimit të jashtëm të pavarur.
Në fushën e zhvillimit dhe ruajtjes së kapitalit njerëzor, ndër të tjera, është arritur anëtarësimi në Regjistrin Evropian të Sigurimit të Cilësisë në arsimin e lartë. Gjithashtu është përmirësuar cilësia dhe përfshirja në arsimin parashkollor: janë arritur objektivat për sigurimin e cilësisë së institucioneve të edukimit dhe kujdesit në fëmijërinë e hershme dhe për përfshirjen e fëmijëve të moshës 0-2 vjeçare dhe atyre të moshës 3-5 vjeçare. Gjithashtu është arritur objektivi për zbatimin e masave aktive të tregut të punës për gratë, të rinjtë, personat me aftësi të kufizuara, personat që jetojnë në zona rurale dhe komunitetet minoritare.
Në fushën e sundimit të ligjit, ndër të tjera, është rritur numri i raporteve të sinjalizimit të procesuara nga Agjencia për Parandalimin e Korrupsionit, dhe vlera e përgjithshme e pasurive të fituara me vepra penale që janë sekuestruar, ngrirë dhe konfiskuar.
Deri në fund të vitit përmbyllet zbatimin e 22 reformave të mbetura, në vlerë prej 131.4 milionë eurosh në fonde të BE-së. Mbi një e treta e këtyre reformave kërkojnë miratim të projektligjeve në Kuvend.
Sa u përket projekteve investuese, u theksua se po vazhdon puna për përgatitjen e tyre dhe u diskutuan sfidat në këtë drejtim. Më tej, janë duke u finalizuar tri marrëveshje ndërkombëtare për programet IPA, nga të cilat Kosova pritet të përfitojmë rreth 258 milionë euro. Së bashku me shume shumën e fondeve që pritet të fitohen nga Plani i Rritjes, pritet që Kosova të përfitojë deri në rreth 400 milionë euro në fonde të BE-së. Këto fonde do të mundësojnë investime të rëndësishme për zhvillimin ekonomik dhe social të vendit dhe në dobi të qytetarëve.
Në fund të takimit, Kryeministri Kurti theksoi sfidat që po përballen reformat dhe kërkoi që përtej sfidave të ketë mobilizim të punëve në funksion të realizimit të hershëm të reformave dhe të arritje së afateve.
