Kryeqyteti Prishtina

17/06/2026

Një popull që lexon ndërton institucione më të forta, shoqëri më të drejta dhe një të ardhme më të sigurt. Ai e mbron historinë e tij, zhvillon mendimin kritik dhe e sheh dijen si të drejtë e përgjegjësi.

Sot, në Panairin e Librit, u bashkuam me autorë, botues dhe dashamirë të leximit për të festuar dijen, kulturën dhe fuqinë e librit.

Sepse çdo libër i blerë sot është një investim për një shoqëri më të lirë, më të arsimuar dhe më të fortë.

17/06/2026

Nënkryetari Florian Dushi priti në takim Kryetarin e Qytetit të Bursës, Şahin Biba

Nënkryetari i Komunës së Prishtinës, Florian Dushi, priti sot në takim zyrtar Kryetarin e Qytetit të Bursës në Turqi, Şahin Biba, i cili po qëndron për vizitë në Prishtinë së bashku me delegacionin e tij.

Gjatë takimit, palët diskutuan për mundësitë e thellimit të bashkëpunimit ndërmjet dy qyteteve në fusha me interes të përbashkët, duke përfshirë zhvillimin ekonomik, kulturën, turizmin, arsimin dhe shkëmbimin e përvojave në qeverisjen lokale.

Nënkryetari Dushi e falënderoi Kryetarin Biba për vizitën dhe shprehu gatishmërinë e Komunës së Prishtinës për të avancuar marrëdhëniet e bashkëpunimit me Bursën, në funksion të zhvillimit dhe përfitimit të qytetarëve të të dyja qyteteve.

Nga ana e tij, Kryetari Şahin Biba vlerësoi mikpritjen e ofruar nga institucionet e Prishtinës dhe theksoi rëndësinë e forcimit të lidhjeve ndërmjet komunave, duke shprehur interesimin për zgjerimin e bashkëpunimit në projekte konkrete me interes të ndërsjellë.

Takimi u zhvillua në frymë miqësore dhe konstruktive, duke konfirmuar vullnetin e përbashkët për vazhdimin e komunikimit dhe bashkëpunimit institucional në të ardhmen.

17/06/2026

Ky mural, i vendosur në zemër të Prishtinës, është një akt kujtese dhe respekti për të gjithë të mbijetuarit e dhunës seksuale gjatë luftës në Kosovë. Ky mural është në nderim të çdo gruaje dhe burri që mbijetoi këtë krim të tmerrshëm lufte.

E përgëzoj Presidenten Jahjaga për këtë iniciativë, kuratoren Eliza Hoxha, Q'art per realizimin. Jam shumë i lumtur që ne, si kryeqytet, kemi pasur mundësinë që, sado pak, ta mbështesim dhe t’i japim hapësirë kësaj pjese të historisë sonë të përbashkët.

Ky mural do të mbetet këtu, që secili që kalon pranë tij të kujtojë sakrificën e këtij populli.

Jahjaga Foundation

12/06/2026

🚦 Njoftim për qytetarët!

Pas përfundimit të një pjese të punimeve në Lakrishte, është rikthyer qarkullimi i mëparshëm në rrugët “Hekurudha” dhe “Vicianum”, me qarkullim njëkahor ⬆️

Ndërsa rrugët “Bekim Fehmiu” dhe “Tirana” vazhdojnë të funksionojnë me qarkullim dykahor.

Ju lutemi të respektoni sinjalistikën rrugore dhe të tregoni kujdes në trafik. 🚗

11/06/2026

Ndiqeni drejtpërdrejt seancën solemne për nder të ditës së Çlirimit të Kryeqytetit 👇🏻

Seancë solemne, për nder të Ditës së Çlirimit të Prishtinës

11/06/2026

🇽🇰Një ditë festë për gjithë Kryeqytetin!

Më 11 qershor, bashkohemi në Sheshin “Skënderbeu” për të shënuar 27-vjetorin e Çlirimit të Prishtinës me muzikë, art dhe atmosferë festive.

Në skenë do të ngjiten Ansambli “Bajram Curri”, Shkolla e Muzikës “Prenk Jakova”, Zwada, grupi Blla Blla Blla dhe DJ First, për ta bërë këtë mbrëmje të paharrueshme.

📍 Sheshi “Skënderbeu”
📅 11 Qershor
🕖 Duke filluar nga ora 19:00

10/06/2026

📢 NJOFTIM PËR QYTETARËT DHE PJESËMARRËSIT NË TRAFIK

Njoftohen qytetarët se, bazuar në vendimin e Kryetarit të Kryeqytetit dhe pas përfundimit të një pjese të punimeve dhe riparimeve infrastrukturore në lagjen Lakrishte, është bërë riorganizimi i qarkullimit të mjeteve motorike në rrugët “Hekurudha” dhe “Vicianum”, duke rikthyer qarkullimin në gjendjen e mëparshme.

🔹 Rruga “Hekurudha” do të jetë me një kah të qarkullimit, duke filluar nga kryqëzimi me rrugën “Magjistralja M-2”, në drejtim të rrugëve “Tirana” dhe “Bekim Fehmiu”.

🔹 Rruga “Vicianum” do të jetë me një kah të qarkullimit, duke filluar nga kryqëzimi me rrugën “Ahmet Krasniqi”, në drejtim të rrugës “Magjistralja M-2”.

🔹 Rrugët “Bekim Fehmiu” dhe “Tirana” do të vazhdojnë të jenë me dy kahje të qarkullimit.

🔹 Këto ndryshime janë bërë me qëllim të përmirësimit të rrjedhës së trafikut, rritjes së sigurisë në komunikacion dhe pas përfundimit të punimeve infrastrukturore në këtë pjesë të lagjes Lakrishte.

🚦 Lusim të gjithë pjesëmarrësit në trafik që të respektojnë sinjalistikën rrugore dhe të tregojnë kujdes të shtuar gjatë qarkullimit.

Faleminderit për mirëkuptimin dhe bashkëpunimin tuaj.

10/06/2026

📢 Kryeqyteti ka kërkuar nga Agjencia Kadastrale e Kosovës marrjen e masave urgjente për përshpejtimin e trajtimit të lëndëve pronësore gjatë sezonës verore.

Aktualisht, një numër i madh i lëndëve po përballen me vonesa për shkak të ngarkesës së sistemit. Një nga arsyet kryesore është se lëndët që kthehen për plotësim te noterët rikthehen sërish në radhën e pritjes sipas datës fillestare të aplikimit, duke krijuar bllokime dhe duke ngadalësuar trajtimin e lëndëve të tjera.

Për këtë arsye, Drejtoria e Kadastrit, Gjeodezisë dhe Legalizimit në Kryeqytet, ka kërkuar që për periudhën 1 qershor – 1 shtator të lirohet përkohësisht radhitja automatike e lëndëve, në mënyrë që të përpunohen më shpejt rastet në procedurë dhe të zvogëlohen afatet e pritjes për qytetarët.

Kjo është veçanërisht e rëndësishme për bashkatdhetarët tanë, të cilët gjatë muajve të verës qëndrojnë për një kohë të shkurtër në Kosovë dhe kanë nevojë t’i përfundojnë procedurat pronësore brenda afateve të arsyeshme.

Po ashtu, kemi kërkuar edhe përmirësime teknike në sistem, që zyrtarët të njoftohen menjëherë kur plotësohen komentet nga noterët dhe të shmanget trajtimi i së njëjtës lëndë nga më shumë se një zyrtar në të njëjtën kohë.

Kryeqyteti mbetet i përkushtuar që qytetarët të marrin shërbime sa më efikase dhe pa vonesa të panevojshme.

10/06/2026

📢 NJOFTIM
Të dashur qytetarë,

Ju njoftojmë se Faza e dytë e dezinsektimit hapësinor në Komunën e Prishtinës për vitin 2026 fillon më 15.06.2026, nga ora 20:00, sipas planit dinamik të operimit. 🦟

💧 Hudhja e larvicideve do të realizohet më 15.06.2026 dhe 16.06.2026, duke filluar prej orës 09:00.

⚠️ Aktiviteti është i varur nga kushtet atmosferike, prandaj varësisht prej tyre mund të ketë ndryshime në datat dhe oraret e realizimit të aktiviteteve.

Drejtoria e Shëndetësisë
Bujar Gashi

09/06/2026

🔥 Prishtina ndizet për Botërorin 2026!

Nga 11 qershori deri më 19 korrik, Sheshi “Zahir Pajaziti” kthehet në stadium të hapur për dashamirët e futbollit.

Çdo ndeshje e Kampionatit Botëror 2026 transmetohet live në ekran gjigant, me atmosferë stadiumi, skenografi unike, aktivitete, bare dhe hapësira për tifozë, familje e shoqëri.

Hyrja është FALAS dhe pa bileta për publikun. Festivali do të ketë edhe VIP Zone për sponsorë, partnerë dhe bileta të dedikuara.

Këtë verë, tradita rikthehet edhe më e madhe përmes Prishtina Football Fest, organizim i KD Events & Communications, i përkrahur nga Kryeqyteti.

Botërori përjetohet në shesh. ⚽🔥